దేశవ్యాప్తంగా 18ఏళ్లు పైబడిన వారికి మే1 నుంచి కొవిడ్ టీకా అందించేందుకు ఏర్పాట్లు జరుగుతున్నాయి. అయితే.. మహారాష్ట్రలో వ్యాక్సినేషన్ను ప్రారంభించలేమని ఆ రాష్ట్ర ప్రభుత్వం తెలిపింది. సరిపడా టీకా డోసులు అందుబాటులో లేకపోవటమే ఇందుకు కారణంగా వెల్లడించింది.
రాష్ట్ర ప్రభుత్వం ఆధ్వర్యంలోని వ్యాక్సినేషన్ కేంద్రాల్లో 18-44 ఏళ్ల వారికి ఉచితంగా టీకా అందిస్తామని ఆరోగ్య మంత్రి రాజేశ్ టోపే తెలిపారు. ప్రైవేట్ కేంద్రాల్లో పౌరులే టీకా రుసుములు చెల్లించాల్సి ఉంటుందని స్పష్టం చేశారు. ఉచిత టీకా పంపిణీ కోసం రాష్ట్ర ప్రభుత్వం రూ.6,500 కోట్లు ఖర్చు చేస్తున్నట్లు చెప్పారు. రాష్ట్రంలో డోసుల కొరతతో చాలా మంది పౌరులకు టీకా అందకపోవచ్చన్న నివేదికల నేపథ్యంలో ఈ వ్యాఖ్యలు చేయటం ప్రాధాన్యం సంతరించుకుంది.
మరోవైపు.. ఏప్రిల్ 28 ఉదయం నాటికి మహారాష్ట్రకు మొత్తం 1,58,62,470 డోసులు అందినట్లు కేంద్ర ఆరోగ్య శాఖ తెలిపింది. ఇంకా 5 లక్షల డోసులు మిగులు ఉన్నట్లు స్పష్టం చేసింది. మరో 5 లక్షల డోసులు వచ్చే మూడు రోజుల్లో పంపుతామని వెల్లడించింది.
లాక్డౌన్ పొడిగింపు..
మహారాష్ట్రలో కొవిడ్ ఉద్ధృతి కొనసాగుతున్నందున మరో 15 రోజులు లాక్డౌన్ పొడిగించింది ఆ రాష్ట్ర ప్రభుత్వం. మే 15 వరకు లాక్డౌన్ అమలవుతుందని రాష్ట్ర ఆరోగ్య మంత్రి టోపే తెలిపారు. ముఖ్యమంత్రి ఉద్ధవ్ ఠాక్రే నేతృత్వంలో జరిగిన కేబినెట్ సమావేశంలో ఈ నిర్ణయం తీసుకున్నట్లు చెప్పారు.
కరోనా కేసులు పెరుగుతున్న నేపథ్యంలో ఏప్రిల్ 4న వారాంతపు లాక్డౌన్, రాత్రి కర్ఫ్యూ విధించింది మహారాష్ట్ర. ప్రైవేటు కార్యాలయాలు, సినిమా హాళ్లు, సెలూన్లు వంటి వాటిపై ఆంక్షలు విధించింది.
ఇదీ చూడండి: '18 ప్లస్'కు టీకా రిజిస్ట్రేషన్ షురూ
