Top Career Options In 2024 : సాంకేతిక అభివృద్ధి కొత్తపుంతలు తొక్కుతున్న వేళ, దేశీయ పరిశ్రమల్లో అనేక కీలక మార్పులు వస్తున్నాయి. ఇవి సంప్రదాయ మార్గాలకు మించి, అనేక మంచి ఉద్యోగ అవకాశాలను ఆవిష్కరిస్తున్నాయి. నేటి యువత ఆశలకు, ఆసక్తులకు అనుగుణం ఉన్న ఈ ఉద్యోగ అవకాశాలు, వారి భవిష్యత్కు మంచి దారి చూపుతాయనడంలో ఎలాంటి సందేహం లేదు. అందుకే ఈ ఆర్టికల్లో 2024లో ఉన్న బెస్ట్ ఛాలెంజింగ్ కెరీర్ ఆప్షన్ల గురించి ఇప్పుడు తెలుసుకుందాం.
- Data Scientist : నేటి డిజిటల్ యుగాన్ని శాసించేది ఈ డేటా సైంటిస్టులే అని చెప్పకతప్పదు. వీరు సంక్లిష్టమైన డేటాను విశ్లేషించి, వ్యాపార సమస్యలకు పరిష్కారాలు కనిపెడతారు. మరింత గొప్పగా ఆన్లైన్ వ్యాపారం ఎలా చేయాలో తెలియజేస్తారు. అందుకే వీరికి మార్కెట్లో మంచి డిమాండ్ ఉంది. ప్రస్తుతం డేటా సైంటిస్ట్లు ఏటా సగటున రూ.14 లక్షల నుంచి రూ.25 లక్షల వరకు సంపాదిస్తున్నారు.
- AI & ML Engineer : భవిష్యత్ మొత్తం ఆర్టిఫీషియల్ ఇంటెలిజెన్స్ (AI), మెషీన్ లెర్నింగ్ (ML) మీద ఆధారపడి ఉంటుందని మార్కెట్ వర్గాలు భావిస్తున్నాయి. అందుకే ఏఐ అండ్ ఎంఎల్ నిపుణులను నియమించుకుంటున్నాయి. వీరు కృత్రిమ మేథ సాయంతో ఆటోమేటిక్గా పనులు పూర్తి చేసే అప్లికేషన్లను రూపొందిస్తారు. ఫలితంగా తక్కువ శ్రమతో, పెద్ద మొత్తంలో ఉత్పత్తులు తయారుచేయడానికి, సేవలు అందించడానికి వీలవుతుంది. అందుకే నేడు ఏఐ అండ్ ఎంఎల్ ఇంజినీర్లకు భారీగా డిమాండ్ పెరుగుతోంది. ప్రస్తుతానికి వీరు సంవత్సరానికి సగటున రూ.11 లక్షల నుంచి రూ.21 లక్షల వరకు జీతం పొందుతున్నారు.
- Digital Marketer : ఆన్లైన్ ప్రపంచానికి దిశానిర్దేశం చేసేది ఈ డిజిటల్ మార్కెటర్లే. వస్తు, సేవలను వివిధ వర్గాల కస్టమర్లకు చేరేవేసే బాధ్యత వీరిదే. ఇందుకోసం వీరు డిజిటల్ ఛానళ్లను, ఆన్లైన్ ప్లాట్ఫామ్లను ఉపయోగిస్తూ ఉంటారు. పైగా నేడు అన్ని వ్యాపారాలు కూడా ఆన్లైన్ ప్లాట్ఫారమ్లకు మారుతున్నాయి. అందుకే డిజిటల్ మార్కెటర్లకు బాగా డిమాండ్ పెరుగుతోంది. ప్రస్తుతం డిజిటల్ మార్కెటర్లు - సీఈఓ, సోషల్ మీడియా, కంటెంట్, ఈ-మెయిల్ మార్కెటింగ్ రంగాల్లో తమదైన శైలిలో దూసుకుపోతున్నారు. ప్రస్తుతం వీరు ఏడాదికి సగటున రూ.4 లక్షల నుంచి రూ.15 లక్షల వరకు సంపాదిస్తున్నారు.
- Cybersecurity Analyst : సాంకేతిక పెరుగుతున్న కొద్దీ, సైబర్ మోసాలు కూడా విపరీతంగా పెరిగిపోతున్నాయి. వీటిని అరికట్టేందుకు సైబర్ సెక్యూరిటీ అనలిస్టుల అవసరం ఎంతైనా ఉంటుంది. వీరు సైబర్ అటాక్లను, సైబర్ ఫ్రాడ్లను అరికట్టడంలో కీలక పాత్ర పోషిస్తారు. అందుకే ఐటీ, డిఫెన్స్, బ్యాంకింగ్ లాంటి వివిధ రంగాల్లో వీరిని నియమించుకుంటున్నారు. భవిష్యత్లో వీరి అవసరం మరింత పెరగవచ్చు. ఇది కచ్చితంగా మంచి ఛాలెంజింగ్ జాబ్ అవుతుంది. ప్రస్తుతం సైబర్ సెక్యూరిటీ అనలిస్టులు సంవత్సరానికి సగటున రూ.6 లక్షల నుంచి రూ.20 లక్షల వరకు సంపాదిస్తున్నారు.
- Prompt Engineer : నేడు చాట్జీపీటీ, బర్డ్ లాంటి అనేక కృత్రిమ మేథస్సుతో పనిచేసే అప్లికేషన్లు అందుబాటులోకి వచ్చాయి. వీటికి సరైన కమాండ్స్ ఇస్తే, మంచి అవుట్పుట్ ఇస్తాయి. ఇందుకోసం పనిచేసేవారే ప్రాంప్ట్ ఇంజినీర్లు. వీరు ఆర్టిఫీషిల్ ఇంటెలిజెన్స్ అప్లికేషన్లు అర్థం చేసుకునే విధంగా భాషా నమూనాలను రూపొందిస్తారు. దీనితో మంచి అవుట్పుట్ లభిస్తుంది. ప్రస్తుతానికి ఈ ప్రాంప్ట్ ఇంజినీర్ జాబ్ అనేది పరిశ్రమకు చాలా కొత్త. కానీ భవిష్యత్లో వీరికి మరింత డిమాండ్ పెరిగే అవకాశం ఉంది. ఈ ప్రాంప్ట్ ఇంజినీర్లు ప్రస్తుతం ఏడాదికి సగటున రూ.5 లక్షల నుంచి రూ.10 లక్షల వరకు సాలరీ పొందుతున్నారు.
- Green Specialist : నేడు ఆధునిక పరిశ్రమల వల్ల, మానవ తప్పిదాల వల్ల పర్యావరణానికి ఎంతో హాని కలుగుతోంది. దీనిని అరికట్టేందుకు, పర్యావరణ పరిరక్షణకు, సుస్థిరతకు గ్రీన్ స్పెషలిస్టుల అవసరం ఎంతైనా ఉంది. వీరు వ్యవసాయం, నిర్మాణం, రవాణా, వ్యర్థాల నిర్వహణ, ఎనర్జీ, వేస్ట్ మేనేజ్మెంట్, పరిశోధన, కన్సల్టింగ్, పాలసీ మేకింగ్ల్లో కీలక పాత్ర వహిస్తారు. ప్రస్తుతం వీరి వార్షిక వేతనం సగటున రూ.4 లక్షల నుంచి రూ.40 లక్షల వరకు ఉంది.
ప్రభుత్వ ఉద్యోగాల కోసం ప్రిపేర్ అవుతున్నారా? ఈ టాప్-10 టిప్స్ మీ కోసమే!
