ప్రముఖ యోగా గురువు రాందేవ్ బాబా.. అల్లోపతి వైద్య శాస్త్రం, వైద్యులను అవమానించేలా మాట్లాడారని భారత వైద్య సంఘం (ఐఎంఏ) ఆరోపించింది. దీనిపై కేంద్ర ఆరోగ్యశాఖ తక్షణం స్పందించి ఆయనపై కేసు నమోదు చేయాలని డిమాండ్ చేసింది. ఈ మేరకు శనివారం సామాజిక మాధ్యమాల్లో ఒక పత్రికా ప్రకటన విడుదల చేసింది ఐఎంఏ. అయితే దీనిపై కేంద్ర ఆరోగ్యమంత్రి డాక్టర్ హర్షవర్ధన్ స్పందించారు. రాందేవ్ బాబా చేసిన వ్యాఖ్యల్ని వెనక్కి తీసుకోవాలని కోరారు. దీనిపై ఆయనకు లేఖ రాశారు.
"అల్లోపతి మందులపై మీ ప్రకటనలతో దేశస్థులు, వైద్యులు తీవ్రంగా బాధపడుతున్నారు. దీనిపై నేను ఇప్పటికే మీకు ఫోన్‌లో తెలియజేశాను. ప్రాణాంతక వైరస్పై వ్యతిరేకంగా వైద్యులు, ఇతర ఆరోగ్య కార్యకర్తలు నిరంతరం పోరాడుతున్నారు. అందుకు వారిని అభినందించాలి. మీరు ఇటువంటి ప్రకటనలు చేసి, కొవిడ్ యోధులను అగౌరవపరచడమే కాక, దేశవాసుల మనోభావాలను తీవ్రంగా గాయపరిచారు."
-హర్షవర్ధన్, కేంద్ర ఆరోగ్యమంత్రి
ఇదీ చదవండి: 'బాబా రాందేవ్‌పై కేసు నమోదు చేయండి'
