కొవిడ్ సమయంలో అనాథ పిల్లలను అక్రమంగా దత్తత తీసుకునే వారిపై కఠిన చర్యలు తీసుకోవాలని అన్ని రాష్ట్రాలు, కేంద్రపాలిత ప్రాంతాలకు ఆదేశాలు జారీ చేసింది సుప్రీం కోర్టు. జాతీయ బాలల హక్కుల పరిరక్షణ కమిషన్(ఎన్సీపీసీఆర్)కు రాష్ట్రాలు సమర్పించిన డేటా ఆధారంగా ఈ ఏడాది జూన్ 5 నాటికి కరోనా వల్ల 30 వేల మందికిపైగా పిల్లలు తల్లిదండ్రులను కోల్పోయినట్లు పేర్కొంది.
అనాథలుగా మారిన లేదా తల్లిదండ్రులను కోల్పోయిన లేదా విడిచిపెట్టిన మైనర్ల సంరక్షణకు చర్యలు తీసుకోవాలని ఉత్తర్వులు జారీ చేసిన ఉన్నత న్యాయస్థానం.. అనాథలను దత్తత తీసుకోవటానికి ఆహ్వానించడం చట్ట విరుద్ధమని పేర్కొంది. సెంట్రల్ అడాప్షన్ రిసోర్స్ ప్రమేయం లేకుండా దత్తత తీసుకోవటానికి అనుమతి లేదని తెలిపింది.
జువెనైల్ జస్టిస్ చట్టం-2015లోని నిబంధనలను, అనాథ పిల్లలకు ప్రయోజనం చేకూర్చే ప్రభుత్వ పథకాల గురించి విస్తృతంగా ప్రచారం చేయాలని సుప్రీంకోర్టు సూచించింది. అనాథలుగా మారుతున్నవారిని గుర్తించి, వారికి సంబంధించిన డేటాను ఎన్సీపీసీఆర్ వెబ్సైట్లో పొందుపరచాలని నిర్దేశించింది. అనాథ పిల్లల పేరుతో అక్రమాలకు పాల్పడుతున్న ఎన్జీఓ/ వ్యక్తులపై కఠిన చర్యలు తీసుకోవాలని పేర్కొంది.
అంతకుముందు, అనాథ పిల్లల కనీస అవసరాలు తీర్చాలని సంబంధిత సంస్థలకు జూన్ 7న ఆదేశాలు జారీ చేసిన సర్వోన్నత ధర్మాసనం.. ఎలాంటి జాప్యం లేకుండా ప్రస్తుత ప్రభుత్వ పథకాల ద్వారా ఆర్థిక సాయం అందించాలని పేర్కొంది.
ఇదీ చూడండి: 44కోట్ల టీకా డోసులకు కేంద్రం ఆర్డర్
