ప్రియుడితో కలిసి సోదరుడిని అతి కిరాతకంగా హత్య చేసింది ఓ మహిళ. అనంతరం ఇద్దరు కలిసి.. శవాన్ని ముక్కలుగా కోసి వివిధ ప్రదేశాల్లో పడేశారు. కొద్ది రోజుల తర్వాత ఓ ప్రాంతంలో బాధితుడి శరీర భాగాలు స్వాధీనం చేసుకున్న పోలీసులు కేసు నమోదు చేసుకుని దర్యాప్తు ప్రారంభించారు. అయితే, సరైన ఆధారాలు లేకపోవడం కారణంగా విచారణ అటకెక్కింది. కర్ణాటకలో ఎనిమిదేళ్ల క్రితం ఈ ఘటన జరగ్గా.. తాజాగా నిందితులిద్దరూ పోలీసులకు చిక్కారు. ఇంతకీ ఆమె తన సోదరుడిని ఎందుకు చంపిందంటే..
పోలీసులు తెలిపిన వివరాల ప్రకారం..
నిందితులు భాగ్యశ్రీ, సుపుత్ర శంకరప్ప.. విజయపుర ప్రాంతానికి చెందిన వారు. భాగ్యశ్రీకి ఓ సోదరుడు ఉన్నాడు. శంకరప్ప తాను పెళ్లి చేసుకున్న మహిళను వదలిపెట్టి.. బెంగళూరు జిగాని ప్రాంతంలో ఓ ప్రైవేటు కంపెనీలో పని చేస్తున్నాడు. ఆ సమయంలోనే భాగ్యశ్రీ, శంకరప్ప మధ్య పరిచయం ఏర్పడి వివాహేతర సంబంధంగా మారింది. అనంతరం ఇద్దరూ ఒకే ఇంట్లో ఉండటం మొదలుపెట్టారు. ఓ రోజు తన సోదరిని చూడటానికి వచ్చిన నాగరాజుకు వీరిద్దరూ ఒకే ఇంట్లో ఉంటున్న విషయం తెలిసింది. దీంతో కోపోద్రిక్తుడైన నాగరాజు.. తన సోదరితో గొడవపడ్డాడు. కాగా, తన సంబంధం విషయం తెలుసుకున్న నాగరాజును చంపేయాలని భావించిన భాగ్యశ్రీ.. తన ప్రియుడు శంకరప్పతో కలిసి పథకం వేసింది. ఈ క్రమంలోనే ఇద్దరూ కలిసి ఓ రోజు నాగరాజును కిరాతకంగా హత్య చేశారు. అనంతరం మృతదేహాన్ని ముక్కలు ముక్కలుగా నరికి వివిధ ప్రదేశాల్లో పడేశారు.
ఆధార్ కార్డు వాడకుండా..
2015 ఆగస్టు 11న నాగరాజు శరీర భాగాలు జిగాని పారిశ్రామిక ప్రాంతంలో దొరికాయి. దీంతో కేసు నమోదు చేసుకున్న పోలీసులు.. దర్యాప్తు చేపట్టారు. ఎంత వెతికినా నిందితుల ఆచూకీ తెలియలేదు. తాజాగా, పరారీలో ఉన్న ఇద్దరు నిందితులను నాశిక్ జిల్లా సిన్నార్ స్టేషన్ పరిధిలో పోలీసులు అరెస్టు చేశారు. కాగా, హత్య చేసిన తర్వాత శంకరప్ప తన పేరును శంకర్గా మార్చుకుని.. ఆధార్ కార్డు, మొబైల్ ఫోన్ ఇతర డాక్యుమెంట్లు వాడకుండా జాగ్రత్త పడ్డారని పోలీసులు తెలిపారు. పేరు మార్చుకున్న తర్వాత శంకరప్ప... మహారాష్ట్రలో భాగ్యశ్రీ చేస్తున్న పనిలోనే చేరాడని పోలీసులు వివరాలు వెల్లడించారు.
