పంజాబ్ పీసీసీ అధ్యక్ష పదవిలో కొనసాగనున్నారు నవజ్యోత్ సింగ్ సిద్ధూ. కాంగ్రెస్ సీనియర్ నేత రాహుల్ గాంధీతో దిల్లీలో శుక్రవారం సమావేశమైన అనంతరం సిద్ధూ తన రాజీనామాను వెనక్కి తీసుకున్నారు. ఈ విషయాన్ని భేటీలో పాల్గొన్న పంజాబ్ ఏఐసీసీ ఇన్ఛార్జ్ హరీశ్ రావత్ వెల్లడించారు.
సమావేశం అనంతరం మీడియాతో మాట్లాడారు సిద్ధూ. తన అభిప్రాయాలను రాహుల్ గాంధీతో పంచుకున్నట్లు తెలిపిన సిద్ధూ.. వాటి పరిష్కారానికి కృషి చేస్తానని రాహుల్ హామీ ఇచ్చినట్లు స్పష్టం చేశారు.
ఇదీ జరిగింది..
గత నెల 28న.. పంజాబ్ రాష్ట్ర ప్రదేశ్ కాంగ్రెస్ కమిటీ అధ్యక్ష పదవికి (పీసీసీ) నవజ్యోత్ సింగ్ సిద్ధూ (Sidhu news) రాజీనామా చేశారు. పంజాబ్ భవిష్యత్, సంక్షేమ అజెండా విషయంలో రాజీపడడం ఇష్టంలేకే ఈ నిర్ణయం తీసుకున్నట్టు రాజీనామా లేఖలో పేర్కొన్నారు. పార్టీలో కొనసాగుతానని స్పష్టం చేశారు.
సంక్షోభంలో కూరుకుపోయిన పంజాబ్ కాంగ్రెస్కు.. జులైలోనే పీసీసీ అధ్యక్షుడిగా పదవీ బాధ్యతలు చేపట్టారు సిద్ధూ.
ఇదీ చూడండి: '2024 ఎన్నికలకు ముందే అయోధ్య రాముని దర్శనం'
