దేశంలో పెరుగుతున్న జనాభాను కట్టడి చేసేందుకు చర్యలు తీసుకోవాలని దాఖలైన ప్రజా ప్రయోజన వ్యాజ్యం(పిల్)లో కక్షిదారుగా కేంద్ర ఆరోగ్య శాఖను చేర్చాలన్న విజ్ఞప్తికి సుప్రీంకోర్టు అంగీకారం తెలిపింది. ఈ మేరకు భాజపా నేత, న్యాయవాది అశ్వినీ కుమార్ దాఖలు చేసిన వ్యాజ్యంపై జస్టిస్ సంజీవ్ ఖన్నా ధర్మాసనం విచారణ చేపట్టింది. ఈ పిల్లో కేంద్ర హోం శాఖ స్థానంలో కేంద్ర ఆరోగ్య మంత్రిత్వ శాఖను కక్షిదారుగా చేర్చుతున్నట్లు తెలిపింది.
జనాభా కట్టడిలో ఇద్దరు సంతానం నిబంధన విధించడం సహా తగిన చర్యలు తీసుకోవాలని పిల్లో పిటిషనర్ పేర్కొన్నారు. అయితే.. దేశంలో కుటుంబ నియంత్రణను బలవంతంగా చేపట్టలేమని సుప్రీంకోర్టుకు గతంలో కేంద్రం తెలిపింది. అంతకుముందు పిటిషనర్ ఈ వ్యాజ్యాన్ని దిల్లీ హైకోర్టులో దాఖలు చేయగా.. ఆ న్యాయస్థానం తోసిపుచ్చింది. దాంతో ఆయన సుప్రీం కోర్టును ఆశ్రయించారు.
ఆ చిన్నారులకు అండగా ఉండాలి..
కరోనా రెండో దశ విజృంభణ నేపథ్యంలో చిన్నారులకు మెరుగైన రక్షణ అందించాల్సిన అవసరం ఉందని సుప్రీంకోర్టు న్యాయమూర్తి ఎస్ రవీంద్ర భట్ పేర్కొన్నారు. సుప్రీంకోర్టు జువెనైల్ జస్టిస్ జస్టిస్ కమిటీ ఛైర్పర్సన్గా ఉన్న ఆయన.. ప్రస్తుత సంక్షోభ సమయంలో చిన్నారుల సంరక్షణపై వివిధ రాష్ట్రాలు అనుసరిస్తున్న విధానాలపై సమీక్ష నిర్వహించారు. యునిసెఫ్ సమన్వయంతో ఈ సమావేశం జరిగింది.
కరోనా బారిన పడి తల్లితండ్రుల్లో ఎవరో ఒకరిని కోల్పోయిన పరిస్థితులను కొందరు చిన్నారులు ఎదుర్కొంటున్నారని రవీంద్ర భట్ పేర్కొన్నారు. తమ తల్లితండ్రులు ఆస్పత్రుల్లో చికిత్స పొందుతున్న సమయంలో మరికొంతమంది పిల్లలు నిస్సహాయులుగా మారుతున్నారని ఆవేదన వ్యక్తం చేశారు. అలాంటి వారికి తగిన సంరక్షణ చర్యలు చేపట్టాలని ఈ సమావేశంలో అధికారులకు సూచించారు.
ఇదీ చూడండి: 'వారం రోజులుగా 180 జిల్లాల్లో కొత్త కరోనా కేసుల్లేవు'
