కర్ణాటకలో ఓ రిటైర్డ్ ఇంటిలిజెన్స్ అధికారి కారు ప్రమాదంలో మృతి చెందారు. యూనివర్సిటీ ఆఫ్ మైసూరులోని మానస గంగోత్రి ప్రాంగణంలో నడుచుకుంటూ వెళ్తుండగా.. ఓ కారు అతన్ని ఢీకొట్టింది. అయితే.. హత్యగా భావించిన పోలీసులు.. కేసు నమోదు చేసి విచారణ చేపట్టారు.
పోలీసులు తెలిపిన కథనం ప్రకారం..
సెంట్రల్ ఇంటెలిజెన్స్ ఏజెన్సీలో పనిచేసి పదవీ విరమణ పొందిన ఆర్ఎన్ కులకర్ణి (83) మానస్ గంగోత్రి ఆవరణలోని ఓ రోడ్డుపై నడుచుకుంటూ వెళ్తున్నారు. ఎదురుగా వచ్చిన ఓ గుర్తు తెలియని కారు అతన్ని ఢీకొట్టింది. తీవ్ర గాయాలపాలైన ఆయనను ఆస్పత్రికి తరలించగా.. చికిత్స పొందుతూ శుక్రవారం ఉదయం మరణించారు. ఘటనా స్థలంలోని సీసీటీవీ ఫుటేజ్లను పరిశీలించిన పోలీసులు.. దీన్ని హత్యగా అనుమానిస్తున్నారు. నడుచుకుంటూ వెళ్తున్న కులకర్ణిని నేమ్ ప్లేట్ లేని ఓ కారు ఉద్దేశపూర్వకంగానే.. ఢీకొట్టి వెళ్లిందని సిటీ పోలీస్ కమిషనర్ డాక్టర్ చంద్రగుప్తా తెలిపారు. ఈ విషయమై జయలక్ష్మీపురం పోలీస్స్టేషన్లో కేసు నమోదైందని నిందితులను త్వరలో అరెస్టు చేస్తామని కమిషనర్ తెలిపారు. దర్యాప్తు కోసం ప్రత్యేక కమిటీలను ఏర్పాటు చేసినట్లు ఆయన వెల్లడించారు.
నగల వ్యాపారి దారుణ హత్య..
బిహార్లో రెండురోజుల క్రితం కిడ్నాప్కు గురైన ఓ నగల వ్యాపారి.. ఆదివారం కాలువలో శవమై కనిపించాడు. కుటుంబ సభ్యుల ఫిర్యాదు మేరకు.. ఈ హత్యతో సంబంధం ఉన్నట్లుగా భావించి ఓ ముగ్గురు వ్యక్తులను అదుపులోకి తీసుకున్నట్లు వెల్లడించారు పోలీసులు.
పోలీసుల కథనం ప్రకారం.. ఆరా ప్రాంతానికి చెందిన హరిజీ గుప్తా అనే నగల వ్యాపారి బుధవారం కిడ్నాప్నకు గురైయ్యాడు. కుటుంబ సభ్యులు అతని కోసం గాలించినా ఫలితం లేకపోవడం వల్ల పోలీసులకు ఫిర్యాదు చేశారు. హరిజీ గుప్తాకు ఆరాలో మూడు బంగారు దుకాణాలు, పట్నాలో రెండు దుకాణాలు ఉన్నాయి. వాటితో పాటుగా.. ఆరా బైపాస్ రోడ్లోని మార్కెట్లో కొన్ని దుకాణాలు ఉన్నాయి. కాగా, హరిజీ వృత్తిరీత్యా న్యాయవాది. బుధవారం రాత్రంతా గుప్తా ఫోన్ మోగుతూనే ఉందని.. గురువారం ఉదయానికి స్విఛ్ ఆఫ్గా వచ్చిందని మృతుడి కుటుంబీకులు తెలిపారు.
అతడి హత్యపై అనుమానం వ్యక్తం చేసిన కుటుంబ సభ్యులు ఓ ముగ్గురిపై ఫిర్యాదు చేశారు. ప్రస్తుతం వారిని అదుపులోకి తీసుకుని విచారణ చేస్తున్నారు. కేసు నమోదు చేసుకున్న పోలీసులు.. రెండు రోజులు గాలింపు చర్యలు చేపట్టారు. అతని ఫోన్ లాస్ట్ సిగ్నల్ బెహియా ప్రాంతంలో ఉన్నట్లు గుర్తించి.. అతడి బైక్ను కనుగొన్నారు. సమీపంలో ఉన్న కొలనులో కుళ్లిన స్థితిలో హరిజీ మృతదేహం కనిపించింది. మృతదేహాన్ని స్వాధీనం చేసుకుని శవపరీక్ష నిమిత్తం ఆస్పత్రికి తరలించారు. అయితే.. హరిజీ తనకున్న మార్కెట్లోని దుకాణాల్లో అద్దెకు ఉంటున్న ఓ షాప్ యజమానితో వాగ్వాదానికి దిగినట్లు పోలీసులు తెలిపారు. హత్యకు గల కారణాలను పరిశీలిస్తున్నామని చెప్పారు.
టీచర్ దెబ్బలకు తాళలేక 9 ఏళ్ల బాలిక మృతి..
టీచర్ దెబ్బలకు తాళలేక 9 ఏళ్ల బాలిక మృతి చెందిన ఘటన కర్ణాటక బెంగళూరులో జరిగింది. బాలిక కుటుంబ సభ్యులు ఇచ్చిన ఫిర్యాదు మేరకు కేసు నమోదు చేశారు పోలీసులు. శనివారం పాఠశాలకు వెళ్లిన బాలికను ఓ టీచర్ కొట్టగా.. అపస్మారక స్థితికి చేరుకుంది. వెంటనే యాజమాన్యం ఓ ప్రైవేట్ ఆస్పత్రికి తరలించింది. అయితే అప్పటికే బాలిక మృతి చెందినట్లు వైద్యులు తెలిపారు.
జామకాయ దొంగలించాడని హత్య!
ఉత్తర్ప్రదేశ్ అలీగఢ్లో దారుణం జరిగింది. జామకాయలు దొంగిలించాడని.. ఓ వ్యక్తిని దారుణంగా చితకబాదారు ఇద్దరు వ్యక్తులు.. తీవ్ర గాయాలపాలైన అతడు ఆస్పత్రిలో చికిత్స పొందుతూ మృతి చెందాడు. మృతుడి బంధువులు ఫిర్యాదు మేరకు కేసు నమోదు చేసుకున్న పోలీసులు.. ఇద్దరు నిందితులను అరెస్ట్ చేశారు.
కుక్కకు ఆహారం పెట్టలేదని కొట్టి చంపిన యువకుడు..
కుక్కకు ఆహారం పెట్టలేదని ఓ యువకుడు ఒకర్ని కొట్టి చంపాడు. కేరళ పాలక్కాడ్లోని ఓ యువకుడు తన కుక్కకు ఆహారం పెట్టలేదని తన బంధువైన 21 ఏళ్ల యువకుడ్ని కొట్టి చంపాడు. దీనిపై కేసు నమోదు చేసుకున్న పోలీసులు నిందితుడ్ని అరెస్ట్ చేశారు.
