పరీక్షల సమయం దగ్గర పడుతున్న కొద్దీ విద్యార్థుల్లో క్రమంగా ఒత్తిడి పెరగడం సహజం. ఈ సమయంలో ఆ ఒత్తిడిని ఎలా ఎదుర్కోవాలి? భయం, ఆందోళనలను ఎలా జయించాలి? వంటి అంశాలపై ప్రధాని నరేంద్ర మోదీ స్వయంగా సలహాలిచ్చే కార్యక్రమం.. 'పరీక్షా పే చర్చ'. తాజాగా.. కరోనా కారణంగా ఈ ఏడాది ఆన్లైన్ వేదికగా జరగనుంది ఈ కార్యక్రమం. ఇందుకోసం దరఖాస్తు ప్రక్రియ ప్రారంభమైంది. గురువారం నుంచి మార్చి 14 వరకు విద్యార్థులు తమ పేర్లను రిజిస్ట్రేషన్ చేసుకునే వెసులుబాటు కల్పించింది కేంద్రం.
అత్యంత ప్రజాదారణ పొందిన ఈ కార్యక్రమానికి ఈసారి తల్లిదండ్రులు, ఉపాధ్యాయులకు అవకాశం కల్పించినట్టు మోదీ తెలిపారు. 'వివిధ అంశాలపై సరదాగా చర్చ సాగే కార్యక్రమం ఇది. నా విద్యార్థి మిత్రులు, వారి తల్లిదండ్రులు, కష్టించి పనిచేసే ఉపాధ్యాయులు ఈ ఏడాది పరీక్షా పే చర్చలో పెద్దఎత్తున పాల్గొంటారని ఆశిస్తున్నాను,' అని మోదీ ట్విట్టర్ వేదికగా తెలిపారు.
'పరీక్షా పే చర్చ 2021'లో.. మోదీని ప్రశ్నలు అడిగే విద్యార్థులను పోటీ ద్వారా ఎంపిక చేయనున్నారు. ఇందుకు సంబంధించిన వెబ్సైట్ లింక్ను ట్విట్టర్లో షేర్ చేశారు. ఈ పోటీలో అర్హత సాధించిన విద్యార్థులు.. దిల్లీలో మోదీతో వీడియో కాన్ఫరెన్స్లో మాట్లాడే అవకాశాన్ని దక్కించుకుంటారు. 9-12వ తరగతి చదువుతున్న విద్యార్థులు మాత్రమే ఇందుకు అర్హులు.
పరీక్షల సమయంలో కలిగే ఒత్తిడి, భయం, ఆందోళనలను జయించేందుకు విద్యార్థులు ఏం చేయాలో చెప్పేందుకు 2018 నుంచి 'పరీక్షా పే చర్చ' కార్యక్రమం నిర్వహిస్తున్నారు మోదీ.
ఇదీ చదవండి: 'అందరికీ టీకా.. 2021లోనే అతిపెద్ద సవాల్'
