Easy Bread Gulab Jamun Recipe: గులాబ్ జామూన్ అంటే ఇష్టం లేని వారు దాదాపు ఉండరు. చాలా మంది ఈ స్వీట్ను ఎంతో ఇష్టపడతారు. కానీ, దీనిని చేయడానికి ఎక్కువ సమయం తీసుకుంటుందని, ఎక్కువ ప్రయాస అని అనుకుంటారు. కానీ, ఇలా చేస్తే ఎలాంటి పిండి అవసరం లేకుండానే ఈజీగా చేసుకోవచ్చు. ఇంకా ఇంట్లో మిగిలిపోతున్న బ్రెడ్ను వాడుకోవచ్చు. మరి ఇంకెందుకు ఆలస్యం ఎప్పుడూ ఒకేరకంగా కాకుండా వెరైటీగా బ్రెడ్తో గులాబ్ జామూన్ ఎలా చేయాలో ఇప్పుడు తెలుసుకుందాం.
కావాల్సిన పదార్థాలు
- నాలుగు వైట్ బ్రెడ్ స్లైసులు
- పావు కప్పు పాలు
- ఒక కప్పు పంచదార
- అర టీ స్పూన్ యాలకుల పొడి
- కొన్ని రేకులు కుంకుమ పువ్వు
- కొన్ని చుక్కలు రోజ్ ఎసెన్స్
- ఒకటిన్నర కప్పుల నీళ్లు
- వేయించడానికి సరిపడా నూనె
తయారీ విధానం
- ముందుగా బ్రెడ్ స్లైసులను తీసుకుని అంచులను కట్ చేసుకుని మధ్యలో భాగాన్ని చిన్న ముక్కలుగా చేసుకోవాలి.
- ఆ తర్వాత వీటిని ఓ గిన్నెలోకి తీసుకుని అందులో కాచి చల్లార్చిన పాలను పోసి చేతితో బాగా కలపాలి.
- ఈ మిశ్రమాన్ని నెమ్మదిగా మాష్ చేసుకుంటూ పిండిముద్దలాగా చేసుకోవాలి. (మరీ గట్టిగా అనిపిస్తే మరికొన్ని పాలను కలుపుకోవచ్చు)
- అనంతరం చిన్న పిండిముద్దని చేతిలోకి తీసుకుని చిన్న చిన్న ఉండలుగా చేసుకోవాలి.
- మరోవైపు స్టౌ ఆన్ చేసి ఓ గిన్నెలో నీళ్లు, పంచదార వేసి గరిటెతో కలుపుతూ ఉండాలి.
- పంచదార కరిగిన తర్వాత అందులోనే కుంకుమపువ్వు రేకులు, యాలకులు, రోజ్ ఎసెన్స్ వేసి మరోసారి కలపాలి.
- 3 నిమిషాలపాటు మరిగించిన తర్వాత స్టౌ ఆఫ్ చేసి పక్కన పెట్టుకోవాలి.
- అనంతరం మరో కడాయిలో నూనె పోసి వేడి చేసుకుని అందులో ముందుగా రెడీ చేసిన బ్రెడ్డు ఉండల్ని వేసుకోవాలి.
- మంటను మీడియం ఫ్లేములో ఉంచి బ్రెడ్డు ఉండలు బంగారు రంగులోకి మారేంత వరకూ వేయించుకోవాలి.
- ఆ తర్వాత ఫ్రై చేసిన బ్రెడ్డు ఉండల్ని పంచదార పాకంలో వేసుకోవాలి.
- ఇప్పుడు ఒకసారి వీటన్నిటినీ కలిపి పంచదార పాకంలోనే సుమారు 30 నిమిషాలపాటు నానపెట్టుకోవాలి.
- అంతే, 30 నిమిషాల తర్వాత సర్వ్ చేసుకుంటే బ్రెడ్డు గులాబ్ జామూన్ ను హాయిగా తినేయవచ్చు.
'ఎగ్ కారం దోశ' ఇలా ఎప్పుడైనా ట్రై చేశారా? స్పైసీ గార్లిక్ చట్నీతో టేస్ట్ అదుర్స్!
