Online games addiction: ప్రస్తుత రోజుల్లో మొబైల్ ఫోన్ ప్రతిఒక్కరి చేతిలో కనిపిస్తుంది. పిల్లల నుంచి పెద్ద వారి వరకు మొబైల్ వాడుతున్నారు. ముఖ్యంగా యువత ఎక్కువగా వాటిని వినియోగిస్తున్నారు. సోషల్ మీడియా, ఆన్లైన్ గేమ్స్ అంటూ.. అర్ధరాత్రి దాటినా మెలకువగా ఉంటూ ఆరోగ్యం పాడుచేసుకుంటున్నారు. ఇటీవల ఆన్లైన్ గేమ్స్కు బానిసై వింతగా ప్రవర్తిస్తున్న సంఘటనలు చాలానే వెలుగు చూశాయి. అలాంటి ఘటనే రాజస్థాన్లోని చిత్తోడ్గఢ్లో జరిగింది.
బాన్సెన్ గ్రామానికి చెందిన ఇర్ఫాన్ అన్సారీ అనే యువకుడు ఆన్లైన్ గేమ్స్కు బానిసై మతి తప్పినట్లు ప్రవర్తిస్తున్నాడు. రోడ్లపై వెళ్తూ హ్యాకర్, హ్యాకర్.. పాస్వర్డ్ మార్చుకోండి అంటూ పిచ్చిగా ఆరుస్తున్నాడు. అన్సారీ గతంలో బిహార్లోని చప్రా ప్రాంతంలో నివసించేవాడు. కొద్ది రోజుల క్రితమే రాజస్థాన్లోని బాన్సెన్కు వచ్చాడు. గంటల కొద్దీ మొబైల్ ఫోన్ పట్టుకునే ఉంటాడని, ఫైరింగ్ గేమ్స్ ఎక్కువగా ఆడుతున్నట్లు గుర్తించామని కుటుంబ సభ్యులు తెలిపారు.
గత గురువారం రాత్రి గేమ్స్ ఆడుతుండగా ఆకస్మత్తుగా ఫోన్ స్విచ్ ఆఫ్ అయింది. ఆ తర్వాత మతిస్థితిమితం కోల్పోయిన వాడిలా ప్రవర్తించటం ప్రారంభించాడు. శుక్రవారం పొద్దున ఉదయ్పుర్ రహదారిపైకి చేరి వాహనాలను ఆపుతూ పాస్వర్డ్స్ మార్చుకోవాలని ఆరవటం చేశాడు. గమనించిన స్థానికులు పట్టుకుని మంచానికి కట్టేశారు. కుటుంబ సభ్యులకు అప్పగించగా.. జిల్లా ఆసుపత్రికి తరలించారు. ప్రస్తుతం మానసిక వైద్య నిపుణుడి పర్యవేక్షణలో చికిత్స అందిస్తున్నారు. అర్ధరాత్రి వరకు మెలకువతో ఉండి గేమ్స్ ఆడితే ఇలాంటి పరిస్థితికి దారితీస్తుందని చెప్పారు.
