18 నుంచి 44 ఏళ్ల వారికి టీకా కోసం కొవిన్ పోర్టల్లో ఆన్ సైట్(టీకా కేంద్రాల వద్ద) రిజిస్ట్రేషన్, అపాయింట్మెంట్ సదుపాయాన్ని కల్పిస్తున్నట్లు కేంద్ర ఆరోగ్య శాఖ సోమవారం ప్రకటించింది. అయితే ప్రస్తుతానికి ఈ సేవలు ప్రభుత్వ కొవిడ్ వ్యాక్సిన్ కేంద్రాల్లోనే(సీవీసీ) అందుబాటులో ఉంటాయని స్పష్టం చేసింది. ప్రైవేటు సీవీసీల్లో ఈ సదుపాయం ఉండదని, అవి తమ టీకా షెడ్యూళ్లను ప్రత్యేకంగా ప్రకటించాలని కేంద్రం ఆదేశించింది.
ఇప్పటివరకూ మే 1 నుంచి 18-44 ఏళ్ల వారికి కేవలం ఆన్లైన్లో నమోదు చేసుకున్నవారికే టీకాలు వేస్తున్నారు. దీనివల్ల వ్యాక్సిన్ తీసుకోవాల్సిన రోజు లబ్ధిదారులు రాకపోతే కొన్ని డోసులు వృథాగా మిగులుతున్నాయి. ఈ నేపథ్యంలో.. నేరుగా ప్రభుత్వ సీవీసీల్లోనే రిజిస్ట్రేషన్లకు కేంద్రం పచ్చజెండా ఊపింది. ఇంటర్నెట్‌, స్మార్ట్‌ ఫోన్‌ లేనివారు ఆయా కేంద్రాలకు వెళ్లి, కొవిన్ వెబ్‌సైట్‌లో పేరు నమోదు చేయించుకొని వ్యాక్సిన్ తీసుకోవాలని తెలిపింది.
ప్రభుత్వ వ్యాక్సినేషన్ కేంద్రాల్లో కొవిన్ వెబ్‌సైట్‌లో పేరు నమోదు చేయించే విషయంలో స్వేచ్ఛను రాష్ట్రాలకే వదిలిపెట్టింది కేంద్రం. టీకాల వృథాను అరికట్టడంలో ఇదో అదనపు చర్య అని తెలిపింది.
ఇదీ చూడండి: కరోనా వేళ.. నత్తనడకన టీకాల పంపిణీ
