నాలుగు నెలల తరువాత భారత్లో అధిక కొవిడ్ కేసులు నమోదయ్యాయి. బుధవారం ఉదయం 8 గంటల నుంచి గురువారం ఉదయం 8 గంటల వరకు.. 754 కరోనా కేసులు నమోదయ్యాయి. కొవిడ్తో కర్ణాటక ఒకరు మృతి చెందారు. మొత్తంగా భారత్లో 4,633 యాక్టివ్ కరోనా కేసులు ఉన్నట్లు కేంద్ర ఆరోగ్య శాఖ వెల్లడించింది. 2022 నవంబర్లో అత్యధికంగా 734 కొవిడ్ కేసులు నమోదైనట్లు తెలిపింది. ఆ తరువాత బుధవారం నుంచి గురువారం ఉదయం వరకు నమోదైన కేసులో అత్యధికమని తెలిపింది.
ప్రభుత్వం తెలిపిన వివరాల ప్రకారం..
కొవిడ్ కారణంగా ఇప్పటి వరకు 5,30,790 మంది మరణించారు. భారత్లో ఇప్పటివరకు నమోదైన కొవిడ్ కేసుల సంఖ్య.. 4,46,92,710. ప్రస్తుతం 0.01 శాతం కొవిడ్ యాక్టివ్ కేసులు ఉన్నాయి. కొవిడ్ కేసుల రికవరీ శాతం 98.80గా ఉంది. కొవిడ్ నుంచి కోలుకున్న వారి సంఖ్య 4,41,57,297కి పెరిగింది. మృతి చెందిన వారి శాతం 1.19గా ఉంది. దేశవ్యాప్తంగా 220.64 కోట్ల వాక్సిన్ డోస్లను ప్రజలకు అందించినట్లు కేంద్ర ఆరోగ్య శాఖ వెల్లడించింది.
రాజస్థాన్లో ఆస్ట్రేలియా పర్యటకులకు కొవిడ్ నిర్ధరణ..
రాజస్థాన్లో.. నలుగురు ఆస్ట్రేలియా పర్యాటకులకు కొవిడ్ నిర్ధరణ అయింది. దీంతో ఆ నలుగురిని రాజస్థాన్ ప్రభుత్వం పరిశీలనలో ఉంచింది. వీరందరిని రాజస్థాన్ యూనివర్సిటీ ఆఫ్ హెల్త్ సైన్సెస్లో ఉంచినట్లు అధికారులు తెలిపారు. బుధవారం ఈ విదేశీ పర్యటకులకు కొవిడ్ నిర్ధరణ అయినట్లు వారు వెల్లడించారు.
"నలుగురు ఆస్ట్రేలియా పౌరులు.. సవాయి మాధోపుర్లోని ఓ హోటల్ బస చేశారు. వీరికి కొవిడ్ నిర్ధరణ అయిన అనంతరం వారందరినీ జైపుర్కు తరలించాం. నలుగురిలో ముగ్గురికి కొవిడ్ లక్షణాలు ఉన్నాయి. ఒకరికి మాత్రం జలుబు ఉంది." అని ఆర్యూఎచ్ఎస్ సూపరింటెండెంట్ డాక్టర్ అజిత్ సింగ్ తెలిపారు. బుధవారం రాజస్థాన్లో మొత్తం 11 మందికి కొవిడ్ నిర్ధరణ అయినట్లు రాష్ట్ర ఆరోగ్య శాఖ వెల్లడించింది. ప్రస్తుతం రాష్ట్రంలో 56 యాక్టివ్ కేసులు ఉన్నట్లు పేర్కొంది.
కొవిడ్ ఎక్కువగా ప్రబలించేందుకు ఒమిక్రాన్ దాని ఉప వేరియంట్లే కారణం..
దేశంలో కొవిడ్ కేసులు పెరిగేందుకు ఒమిక్రాన్ దాని ఉప వేరియంట్లే కారణమని కేంద్ర ఆరోగ్య శాఖ సహాయ మంత్రి.. భారతి ప్రవీణ్ పవార్ తెలిపారు. మంగళవారం రాజ్యసభలో సభ్యులు అడిగిన ప్రశ్నకు మంత్రి లిఖిత పూర్వకంగా సమాధానమిచ్చారు. గత నాలుగు నెలల్లో దేశవ్యాప్తంగా.. ఇండియన్ సార్స్-కోవ్-2 జెనోమిక్స్ కన్సార్టియం విశ్లేషించిన నమూనాలతో ఈ విషయం వెల్లడైనట్లు ఆమె పేర్కొన్నారు. పరీక్షల్లో 1900 కంటే ఎక్కువ.. ఒమిక్రాన్ దాని సబ్-వేరియంట్‌లు గుర్తించినట్లు మంత్రి వెల్లడించారు.
