Narendra Modi Himachal Pradesh: దేశంలో విద్యుత్తు ఉత్పత్తి సామర్థ్యంలో 40 శాతం శిలాజేతర ఇంధనాల ద్వారానే చేపట్టాలనే లక్ష్యాన్ని గడువుకన్నా ముందుగానే సాధించామని తెలిపారు ప్రధాన మంత్రి నరేంద్ర మోదీ. శిలాజేతర ఇంధనాల ద్వారా విద్యుత్తు ఉత్పత్తిని 2030 నాటికి 40 శాతానికి పెంచాలని లక్ష్యంగా పెట్టుకున్నట్లు చెప్పారు. అయితే, 2021లోనే దానిని సాధించామన్నారు. హిమాచల్ప్రదేశ్లో పలు హైడ్రోపవర్ ప్రాజెక్టుల ప్రారంభం, శంకుస్థాపన చేసిన సందర్భంగా ఈ వ్యాఖ్యలు చేశారు.
" 2030 నాటికి దేశంలో శిలాజేతర ఇంధనాల ద్వారా 40 శాతం విద్యుత్తు ఉత్పత్తిని చేపట్టాలని 2016లో లక్ష్యంగా పెట్టుకున్నాం. 2021 నవంబర్లోనే ఆ లక్ష్యాన్ని చేరుకోవటం ప్రతి భారతీయుడికి గర్వకారణం. పర్యావరణాన్ని కాపాడుకుంటూనే అభివృద్ధిలో దూసుకుపోతున్న భారత్పై ప్రపంచం మొత్తం ప్రశంసలు కురిపిస్తోంది. సౌర విద్యుత్తు, జల విద్యుత్తు, పవన విద్యుత్తు, గ్రీన్ హైడ్రో పవర్.. ఇలా ప్రతి పునరుత్పాదక ఇంధనాన్ని వినియోగించుకునేందుకు భారత్ కృషి చేస్తోంది."
- నరేంద్ర మోదీ, ప్రధానమంత్రి.
హిమాచల్ప్రదేశ్లో భాజపా ప్రభుత్వం నాలుగేళ్లు పూర్తి చేసుకున్న వేళ ఆ రాష్ట్రంలో పర్యటించారు ప్రధానమంత్రి నరేంద్ర మోదీ. ఈ సందర్భంగా హమిర్పుర్ జిల్లాలో రూ.680 కోట్లతో నిర్మించిన ధౌలా సిద్ధు జల విద్యుత్ ప్రాజెక్ట్ను ప్రారంభించారు. దీని సామర్థ్యం 66 మెగావాట్లు. మొత్తంగా రూ.11,281 కోట్ల విలువైన పలు అభివృద్ధి ప్రాజెక్టులకు శంకుస్థాపన చేశారు.
హిమాచల్ ప్రదేశ్ గ్లోబల్ ఇన్వెస్టర్స్ రెండో సదస్సుకు అధ్యక్షత వహించారు ప్రధాని మోదీ. రూ.28వేల కోట్లు విలువైన 287 ప్రాజెక్టుల ప్రారంభం ద్వారా రాష్ట్రంలో పెట్టుబడులు ఊపందుకుంటాయని అధికార వర్గాలు తెలిపాయి.
హిమాచల్ ప్రదేశ్లో ముఖ్యమంత్రి జైరామ్ ఠాకూర్ నేతృత్వంలోని భాజపా ప్రభుత్వం 2017, డిసెంబర్ 27న కొలువుదీరింది. సిమ్లాలో జరిగిన ఈ ప్రమాణ స్వీకారోత్సవానికి ప్రధాని మోదీ హాజరయ్యారు.
ఇదీ చూడండి: 'ఆరోగ్య సూచీ'లో కేరళ టాప్- తెలంగాణకు మూడో ర్యాంక్
