'నారదా స్టింగ్' కేసులో బంగాల్ మంత్రులు ఫిర్హాద్ హకీం, సుబ్రతా ముఖర్జీ, ఎమ్మెల్యే మదన్ మిత్రా సహా మాజీ మేయర్ సోవన్ ఛటర్జీని కేంద్ర దర్యాప్తు సంస్థ(సీబీఐ) సోమవారం అరెస్టు చేసింది. కోల్కతాలో వీరిని అదుపులోకి తీసుకుంది. ఓ సంస్థ నుంచి డబ్బులు తీసుకుంటుండగా కెమెరాలో చిక్కారనే ఆరోపణలు ఈ నేతలపై ఉన్నాయి. వీరిపై సీబీఐ అభియోగపత్రం నమోదు చేయనుందని అధికారులు తెలిపారు.
నిజామ్ ప్యాలెస్లోని సీబీఐ కార్యాలయానికి ఈ నలుగురు నేతలు.. సోమవారం ఉదయం చేరుకున్నారు. వీరి అరెస్టు వార్త.. మీడియాలో ప్రసారమైన కాసేపటికి.. సీబీఐ కార్యాలయానికి బంగాల్ ముఖ్యమంత్రి మమతా బెనర్జీ కూడా చేరుకున్నారు. 2014లో మంత్రులుగా ఉన్న ఈ నలుగురు నేతలపై విచారణకు అనుమతిస్తూ.. ఆ రాష్ట్ర గవర్నర్ జగదీప్ ధన్కర్ ఇటీవల ఆదేశాలు జారీ చేశారు.
బంగాల్లో ఇటీవల ముగిసిన ఎన్నికల్లో హకీం, ముఖర్జీ, మిత్రా మళ్లీ ఎమ్మెల్యేలుగా ఎన్నికయ్యారు. కాగా.. టీఎంసీని వీడి భాజపాలో చేరారు సోవన్ ఛటర్జీ.
అసలేంటీ కేసు..
మాథ్యూ శామ్యూల్ ఆధ్వర్యంలోని నారదా టీవీ ఛానల్.. 2014లో ఓ స్టింగ్ ఆపరేషన్ నిర్వహించింది. ఇందులో టీఎంసీ మంత్రులు, ఎంపీలు, ఎమ్మెల్యేలు.. ఓ డొల్ల కంపెనీ నుంచి డబ్బులు తీసుకున్నట్లు తేలింది. 2016 అసెంబ్లీ ఎన్నికలకు ముందు ఈ వీడియో టేపులు బహిర్గతమయ్యాయి. ఈ అంశంపై దర్యాప్తు బాధ్యతలను 2017లో సీబీఐకి అప్పగిస్తూ కలకత్తా హైకోర్టు ఆదేశాలు జారీ చేసింది.
ఇదీ చూడండి: 'దేశ ప్రజలను కష్టాల్లోకి నెట్టిన మోదీ'
ఇదీ చూడండి: ఆకలి కోరల్లో అభాగ్యులు
