జూదంలో భార్యను పందెంగా పెట్టి ఓడిపోయాడు ఓ వ్యక్తి. ఉత్తరాఖండ్ హరిద్వార్లోని లక్సర్లో ఈ ఘటన జరిగింది. జూదానికి అలవాటు పడి తనను పందెంగా పెట్టాడని తన భర్తపై ఆరోపణలు చేశారు బాధిత మహిళ. అందులో ఓడిపోవడం వల్ల తనను ఇతరులతో లైంగిక సంబంధం పెట్టుకోవాలని బలవంతం చేసినట్లు తెలిపారు. దీనిపై న్యాయస్థానంలో ఫిర్యాదు చేశారు. కోర్టు ఆదేశాల ప్రకారం ఎనిమిది మందిపై పోలీసులు కేసు నమోదు చేసుకున్నారు.
కొత్వాలి ప్రాంతంలో నివసించే ఓ మహిళకు 2021 మార్చిలో ఆసిఫ్తో పెళ్లి అయింది. ముస్లిం సంప్రదాయాల ప్రకారం జరిగిన ఈ వివాహం కోసం ఆ మహిళ కుటుంబ సభ్యులు భారీగా ఖర్చు చేశారు. రూ.ఏడు లక్షలు కట్నం ఇచ్చారు. బంగారు, వెండి ఆభరణాలు, బైక్ కొనిచ్చారు. అయినప్పటికీ ఆసిఫ్ కుటుంబం సంతృప్తి చెందలేదు.
కారు కొనివ్వాలని ఆమెను వేధించారు. క్రమంగా వేధింపులు ఎక్కువయ్యాయి. బాధితురాలి భర్తకు డ్రగ్స్ అలవాటు ఉంది. జూదం ఆడేవాడు. రోజూ తాగొచ్చి డబ్బుల కోసం గొడవ చేసేవాడు. 2021 నవంబర్లో డ్రగ్స్ తీసుకొని తనతో అసహజ శృంగారానికి పాల్పడ్డాడని మహిళ ఆరోపించారు. తన పరిస్థితిని ఆసరాగా తీసుకొని భర్త సోదరుడు షకీబ్.. తనతో అసభ్యంగా ప్రవర్తించేవాడని మహిళ పేర్కొన్నారు. వీటిపై తన పుట్టింట్లో ఫిర్యాదు చేసినా.. వారు పట్టించుకోలేదని తెలిపారు. ఇదే క్రమంలో ఓ రోజు ఇద్దరు గుర్తు తెలియని వ్యక్తుల్ని తన భర్త వెంట తీసుకొచ్చాడని.. జూదంలో ఓడిపోయినందున వారితో శారీరక సంబంధం పెట్టుకోవాలని ఒత్తిడి చేశాడని ఆరోపించారు. దీనికి నిరాకరించినందుకు భర్త తనకు ట్రిపుల్ తలాక్ ఇచ్చాడని మహిళ తెలిపింది. తనకు న్యాయసహాయం అందించాలని అభ్యర్థించింది.
రూ.1.80 కోట్లు కాజేసి...
మరోవైపు.. రెండో పెళ్లి చేసుకోవాలన్న 70ఏళ్ల వ్యక్తికి.. ఓ మహిళ షాక్ ఇచ్చింది. రూ.1.80 కోట్లు తన ఖాతాలోకి బదిలీ చేయించుకొని పరార్ అయింది. ఈ ఘటన ఉత్తర్ప్రదేశ్ రాజధాని లఖ్నవూలో జరిగింది. కార్డియాలజిస్ట్గా పనిచేసే బాధితుడు భార్య మూడేళ్ల క్రితం చనిపోయింది. రెండో పెళ్లి చేసుకుందామని భావించి న్యూస్పేపర్లో యాడ్ ఇచ్చాడు. చాలా ప్రపోజల్స్ వచ్చాయి.
కానీ, 40ఏళ్ల కృష్ణ శర్మపై అతడు మనసు పారేసుకున్నాడు. ఆమెకు తరచుగా కాల్స్ చేయడం, మాట్లాడుకోవడం వంటివి కొనసాగించాడు. అమెరికాలోని ఫ్లోరిడాలో ఉంటున్నానని చెప్పి మహిళ అతడికి దగ్గరైంది. మెరైన్ ఇంజినీర్గా పనిచేస్తున్నానని పరిచయం చేసుకుంది. విడాకులు తీసుకొని ఒంటరిగా జీవిస్తున్నానని తెలిపింది.
ఓ పనిలో భాగంగా కార్గో షిప్లో ముంబయికి వస్తున్నానని కార్డియాలజిస్ట్కు చెప్పింది. అక్కడి నుంచి లఖ్నవూకు వచ్చి కలుస్తానని ఆశ పెట్టింది. ఏడేళ్లుగా షిప్పింగ్ కంపెనీలో జాబ్ చేస్తున్నానని.. ఇకపై దాన్ని వదిలేసి వ్యాపారం చేస్తానని కార్డియాలజిస్ట్ను నమ్మించింది. ఆ తర్వాత భారత్లోనే ఉంటానని చెప్పింది. కార్గో షిప్ ప్రయాణంలో సముద్ర దొంగల భయం ఎక్కువగా ఉంటుందని.. అందువల్ల రూ.7లక్షల బంగారాన్ని అమెరికా నుంచి లఖ్నవూ అడ్రెస్కు పంపిస్తున్నానని చెప్పింది. దాన్ని తీసుకోవాలని సూచించింది.
కొరియర్ కంపెనీ వివరాలన్నీ ఇచ్చింది మహిళ. వారిని కార్డియాలజిస్ట్ సంప్రదించగా.. కస్టమ్స్ డ్యూటీ, పర్మిషన్ ఫీజు వంటి రుసుములు చెల్లించాలని చెప్పారు. ఇలా రూ.1.80 కోట్లు కట్టించుకున్నారు. చివరకు పేమెంట్ అయిపోయిన తర్వాత కృష్ణ శర్మ ఫోన్ తీయడం మానేసింది. మోసపోయానని డాక్టర్కు అనుమానం వచ్చింది. వెంటనే లఖ్నవూలోని సైబర్ క్రైమ్ పోలీస్ స్టేషన్లో ఫిర్యాదు చేశాడు.
ఇదీ చదవండి:
