మహారాష్ట్ర నాగ్పుర్లో కరోనా కేసులను అరికట్టేందుకు లాక్డౌన్ విధించింది రాష్ట్ర ప్రభుత్వం. ఫలితంగా.. ఈ నెల 15 నుంచి 21 వరకు కఠిన ఆంక్షలు అమల్లో ఉంటాయి. అత్యవసర సేవలకు మాత్రం మినహాయింపు ఉంటుందని అధికారులు తెలిపారు.
పుణెలో లాక్డౌన్ లేదు కానీ..
పుణెలో కొవిడ్ రోజువారీ కేసుల సంఖ్య గణనీయంగా పెరుగుతోంది. అయినప్పటికీ అక్కడ లాక్డౌన్ ఆంక్షలు అమల్లో లేవు. కానీ, రాత్రి వేళ కర్ఫ్యూ నిబంధనలు అమలు చేస్తోంది అక్కడి పాలనా యంత్రాంగం. మార్చి 14 వరకు పాఠశాలలు, కళాశాలల మూసివేత కొనసాగుతోంది. అయితే.. త్వరలోనే కఠిన నిబంధనలు అమలు చేస్తామని పుణె మేయర్ మురళీధర్ మొహోల్ తెలిపారు.
ఔరంగాబాద్లో..
ఔరంగాబాద్లో రికార్డు స్థాయిలో కొవిడ్ కేసులు వెలుగుచూస్తున్నాయి. దీంతో తీవ్ర ఆందోళన చెందుతున్న స్థానిక పాలనా యంత్రాంగం.. అక్కడ పాక్షిక లాక్డౌన్ విధించింది. ఉదయం 6 గంటల నుంచి 9 గంటల వరకే దుకాణాలు, మార్కెట్లకు అనుమతించింది. వారాంతాల్లో అన్ని దుకాణాలు, మార్కెట్లు, హోటళ్లు మూసివేయాలని మార్గదర్శకాలు జారీ చేసింది.
మరోసారి కరోనా హాట్స్పాట్గా 'ఆనంద్వన్'..
ప్రసిద్ధ ఆనంద్వన్.. రెండో దశ కరోనా విజృంభణలో మరోసారి వైరస్ హాట్స్పాట్ కేంద్రంగా మారింది. భారీ స్థాయిలో వైరస్ కేసులు వెలుగు చూస్తున్నందున ఇక్కడ కొవిడ్ కేర్ సెంటర్ను ఏర్పాటు చేశారు అధికారులు. కరోనాను అరికట్టేందుకు అధికారులు ప్రత్యేక చర్యలు చేపట్టినట్టు సమాచారం.
ఇదీ చదవండి: దేశవ్యాప్తంగా మరో 22,854మందికి కరోనా
