కొవిడ్ నేపథ్యంలో ఉత్తరాఖండ్‌లోని హరిద్వార్ కుంభమేళాలో పాల్గొని తిరిగొచ్చిన వారిపై పలు రాష్ట్రాలు ఆంక్షలు విధిస్తున్నాయి. కుంభమేళాకు వెళ్లి వచ్చిన దిల్లీ వాసులు 14 రోజులు హోంక్వారంటైన్‌లో ఉండాలని దిల్లీ విపత్తు నిర్వహణశాఖ ఆదేశించింది. ఈ మేరకు కుంభమేళాకు వెళ్లి వచ్చినవారు 24గంటల్లో తమకు వివరాలు సమర్పించాలని స్పష్టంచేసింది. నిబంధనలు పాటించకపోతే ప్రభుత్వ క్వారంటైన్‌కు తరలిస్తామని పేర్కొంది.
మధ్యప్రదేశ్లో
కుంభమేళాలో పాల్గొన్న భక్తులను ఐసోలేషన్కి తరలించాలని మధ్యప్రదేశ్ ప్రభుత్వం శనివారం అన్ని జిల్లాల కలెక్టర్లకు ఆదేశాలు జారీ చేసింది. రాష్ట్రంలో 60వేలకుపైగా క్రియాశీల కేసులు ఉన్నాయి. కరోనాను అదుపు చేసేందుకు చేపట్టిన చర్యలకు ప్రజలు సహకరించాలని ప్రభుత్వం విజ్ఞప్తి చేసింది.
గుజరాత్లో నెగెటివ్ తప్పనిసరి..
కుంభమేళా నుంచి తిరిగి వచ్చిన వారికి ఆర్టీపీసీఆర్ పరీక్షలను తప్పనిసరి చేసింది గుజరాత్ ప్రభుత్వం. ఈ మేరకు ముఖ్యమంత్రి విజయ్ రూపానీ శనివారం ఆదేశాలు జారీ చేశారు. జిల్లా కలెక్టర్లు వీరిపై నిఘా ఉంచాలని.. స్వగ్రామాల్లోకి ప్రవేశించకుండా నాకాబందీ నిర్వహించాలని సూచించారు. ఎంపీలు, ఎమ్మెల్యేలు, ఉన్నతాధికారులతో పాటు ఉప ముఖ్యమంత్రి నితిన్ పటేల్‌తో కలిసి గుజరాత్ జామ్‌నగర్‌లో కరోనా వైరస్ పరిస్థితిపై సమీక్షించారు.
కరోనా రోగుల చికిత్సకు గుజరాత్ వ్యాప్తంగా 25-30 వేల పడకలను అతి కొద్ది సమయంలోనే సమకూర్చినట్లు రూపానీ వెల్లడించారు.
ఒడిశాలోనూ..
కుంభమేళాకు హాజరై తిరిగి రాష్ట్రంలోకి ప్రవేశించేవారు 14 రోజుల నిర్బంధంలో ఉండాల్సిందేనని ఒడిశా ప్రభుత్వం ప్రకటించింది. వీరందరికీ కొవిడ్-19 పరీక్షలు తప్పనిసరి చేసింది. ఇంట్లో లేదా తాత్కాలిక వైద్య శిబిరాల్లో స్వీయ నిర్బంధాన్ని పూర్తి చేయవచ్చని ఒడిశా వైద్యాధికారులు తెలిపారు.
కుంభమేళాలో పాల్గొన్న భక్తులను గుర్తించేందుకు ఉత్తరాఖండ్ ప్రభుత్వ పోర్టల్లో రిజిస్టర్ చేసుకున్న వ్యక్తుల జాబితాను సిద్ధం చేశారు అధికారులు. వీరందరినీ ట్రాక్ చేసి.. వారి ఆరోగ్య పరిస్థితిని పర్యవేక్షించాలని నిర్ణయించారు. లక్షలాది భక్తులు హాజరైన ఈ కుంభమేళాను 'సూపర్ స్ప్రెడర్' ఈవెంట్గా పరిగణిస్తున్నారు.
హరిద్వార్లో గత ఐదురోజుల్లోనే 2,167 మంది కరోనా బారిన పడ్డారు. మరోవైపు రికార్డు స్థాయిలో కేసులు వెలుగుచూస్తున్నప్పటికీ.. కుంభమేళా ఏప్రిల్ 30 వరకు కొనసాగుతుందని అధికారులు తెలిపారు.
ఇవీ చదవండి: కుంభమేళాపై అఖాడాల దారెటు- ముందుగానే ముగిస్తారా?
