కదులుతున్న రైల్లో నొప్పులతో బాధపడుతున్న నిండు గర్భిణీకి.. ఓ ల్యాబ్ టెక్నీషియన్ పురుడు పోసిన ఘటన యూపీ మధుర రైల్వే స్టేషన్ పరిధిలో జరిగింది. అచ్చం అమీర్ఖాన్ '3 ఇడియట్స్' సినిమాలో లాగే వీడియో కాల్ ద్వారా డాక్టర్ చెప్పే సూచనలు పాటిస్తూ పండంటి బిడ్డకు ఆయువు పోశారు.
ఉత్తర రైల్వే డివిజనల్ ఆసుపత్రిలో ల్యాబ్ టెక్నీషియన్గా పని చేసే సునీల్ ప్రజాపతి.. దిల్లీ నిజాముద్దీన్ నుంచి మధ్యప్రదేశ్ సాగర్కు రైల్లో బయలుదేరారు. ఫరీదాబాద్ సమీపంలోకి రాగానే.. ఓ మహిళ పురిటి నొప్పులతో బాధపడుతూ కనిపించింది. తోడుగా ఆమె సోదరుడు ఉన్నారు. జనవరి 20న డెలివరీ తేదీ ఉండటం వల్ల దమోహ్లోని ఆసుపత్రికి వెళ్తున్నట్లు వారు సునీల్కు తెలిపారు.
మా ఆసుపత్రిలో పనిచేసే డా.సుపర్ణకు ఫోన్ ద్వారా విషయాన్ని తెలియజేశాను. ఆమె వీడియో కాల్ ద్వారా పలు సూచనలు చేశారు. వాటిని జాగ్రత్తగా పాటిస్తూ సదరు మహిళకు పురుడు పోశాను. ఆర్పీఎఫ్ పోలీసులకు సమాచారం అందించగా.. తల్లి బిడ్డలిద్దరినీ మధుర జిల్లా ఆసుపత్రికి తరలించారు. వారిద్దరూ క్షేమంగా ఉన్నారు. నేను డాక్టర్ కానప్పటికీ.. ఆ మహిళకు చేసిన సహాయంపై చాలా సంతోషంగా ఉన్నాను.
-సునీల్ ప్రజాపతి, ల్యాబ్ టెక్నీషియన్.
ఇదీ చదవండి: 'సాగు చట్టాలపై నిష్పక్షపాతంగా చర్చలు!'
