IIT-M Dalit Scholar Sexually Assault: ఐఐటీ మద్రాస్లో పీహెచ్డీ చదువుతున్న దళిత విద్యార్థినిపై లైంగిక వేధింపుల కేసును సీబీ-సీఐడీకి బదిలీ చేయాలని తమిళనాడు ప్రభుత్వాన్ని ఆల్ ఇండియా డెమొక్రటిక్ ఉమెన్ అసోసియేషన్(ఏఐడీడబ్ల్యూఏ) కోరింది. 'ఐఐటీ మద్రాస్లో బంగాల్కు చెందిన దళిత విద్యార్థినిపై నలుగురు తోటి విద్యార్థులు రెండేళ్లు లైంగిక వేధింపులకు పాల్పడ్డారు. ఆ దృశ్యాలను వీడియో తీసి బెదిరించారు. ఈ అంశంపై ప్రొఫెసర్కు ఫిర్యాదు చేసినప్పటికీ.. ఎలాంటి చర్యలు తీసుకోలేదు.' అని బాధితురాలు ఫిర్యాదులో పేర్కొన్నట్లు ఏఐడీడబ్ల్యూఏ జనరల్ సెక్రటరీ పీ సుగాంతీ తెలిపారు.
'బాధితురాలు ఐఐటీ పరీక్షల్లో తప్పి, మానసికంగా కుంగిపోయింది. ఎవరూ సహాయం చేయకపోయేసరికి ఆత్మహత్యాయత్నం కూడా చేసింది. క్యాంపస్ ఫిర్యాదుల కమిటీకి 2020లో ఫిర్యాదు చేసినప్పటికీ.. వారు దర్యాప్తును ఇప్పటికీ పూర్తి చేయలేదు. వేధింపులపై మార్చి 2021న మైలపోర్ మహిళా పోలీస్ స్టేషన్లో కూడా బాధితురాలు ఫిర్యాదు చేసింది. అక్కడ కేసుపై ఎలాంటి చర్యలు తీసుకోకపోగా.. బాధితురాలుని స్టేషన్ నుంచి బయటకు లాగేశారు.' అని చెప్పారు సుగాంతీ. క్యాంపస్ అంతర్గత ఫిర్యాదుల కమిటీ ఈ కేసుపై విచారణ జరిపి పూర్తి నివేదికను సమర్పించాలని కోరారు. దోషులకు కఠిన శిక్ష విధించాలని డిమాండ్ చేశారు.
షెల్టర్ హోమ్లో..: దిల్లీ షెల్టర్ హోమ్లో ఇద్దరు మహిళలపై అత్యాచారం జరిగిన ఘటన ఆలస్యంగా వెలుగులోకి వచ్చింది. సబ్జీ మండీలోని దుసిబ్ షెల్టర్ హోమ్స్లో ఈ ఘటన జరిగింది. దిల్లీ అర్బన్ షెల్టర్ ఇంప్రూమెంట్ బోర్డు ఈ షెల్టర్ హోమ్స్ను నిర్వహిస్తోంది. ఆశ్రయ్ అధికార్ అభియాన్ అనే స్వచ్ఛంద సంస్థ దీని బాధ్యతలు నిర్వహిస్తోంది. ఈ క్రమంలో షెల్టర్ హోమ్లో జనవరి 8న ఇద్దరు వ్యక్తులు తనపై అత్యాచారం చేశారని ఓ మహిళా సేవకురాలు ఆరోపించింది. ఓ అధికారి కూడా ఇందులో పాలుపంచుకున్నారని షల్టర్ హోమ్ డైరెక్టర్కు ఫిర్యాదు చేసింది. అయితే.. తనను హోమ్ నుంచి బయటకు లాగేసి.. బెదిరించారని మహిళ ఆరోపించింది.
జనవరి 23న ఇచ్చిన ఫిర్యాదులో ఓ దివ్యాంగురాలిపై కూడా అత్యాచారం చేశారని పేర్కొంది. ఈ మొత్తం విషయాన్ని మహిళా కమిషన్కు ఫిర్యాదు చేసింది బాధితురాలు. కేసు నమోదు చేసిన పోలీసులు.. దర్యాప్తు కొనసాగిస్తున్నారు. దిల్లీ మహిళా కమిషన్ సభ్యురాలు స్వాతి మలివాల్.. షెల్టర్ హోమ్ను సందర్శించారు.
ఇదీ చదవండి: 15 ఏళ్ల బాలికపై గ్యాంగ్ రేప్.. నిందితుల్లో ఆ ఎమ్మెల్యే కుమారుడు!
