Hijab controversy: కర్ణాటకలో కొద్ది కాలంగా కొనసాగుతున్న హిజాబ్ వివాదం ఇప్పట్లో సద్దుమణిగేలా కనిపించటం లేదు. విద్యాసంస్థల్లో యూనిఫాం నిబంధన తప్పనిసరిగా పాటించాలని హైకోర్టు తీర్పు చెప్పినప్పటికీ.. కొన్ని ప్రాంతాల్లో విద్యార్థులు హిజాబ్ ధరిస్తున్న సంఘటనలు వెలుగు చూస్తున్నాయి. తాజాగా బెళగావి జిల్లాలోని విజయ పారా వైద్య కళాశాలకు నిరవధిక సెలవులు ప్రకటించటం చర్చనీయాంశంగా మారింది.
ఇదీ జరిగింది..
యూనిఫాం నిబంధనను తప్పనిసరిగా పాటించాల్సిందేనని హైకోర్టు తీర్పు ఇచ్చినప్పటికీ.. విజయ పారా మెడికల్ కళాశాలకు చెందిన కొందరు విద్యార్థులు.. హిజాబ్ ధరించి తరగతులకు హాజరయ్యారు. హిజాబ్ తీసివేయాలని కళాశాల ప్రిన్సిపాల్ డాక్టర్ ప్రకాశ్ వారిని కోరగా.. అందుకు అంగీకరంచలేదు. తరగతులను బహిష్కరించి బయటకు వెళ్లారు. కళాశాల ప్రాంగణంలో ఆందోళనకు దిగారు. తమ బుర్కాలు, నాకబ్లు తరగతి గదికి వచ్చాక తీసేస్తామని, కానీ హిజాబ్లు తీయబోమని స్పష్టం చేశారు. తమను క్లాసులకు అనుమతించాలని డిమాండ్ చేశారు. ఆ తర్వాత ఓ విద్యార్థిని వెళ్లి ప్రిన్సిపాల్తో మాట్లాడినప్పటికీ ఎలాంటి ఫలితం కనిపించలేదు. దీంతో కళాశాలకు నిరవధిక సెలవులు ప్రకటించారు ప్రిన్సిపాల్.
"హిజాబ్పై వివాదం చెలరేగిన క్రమంలో కళాశాలకు సెలవులు ప్రకటించాం. దీనిపై డీసీతో మాట్లాడతాను. తదుపరి ఆదేశాలు వచ్చే వరకు కళాశాల మూసే ఉంటుంది. కాలేజీ తిరిగి తెరిచాక అదనపు తరగతులు తీసుకుంటాం. ఏ ఒక్క విద్యార్థికి హాని జరగకూడదనే ప్రస్తుతం సెలవులు ఇవ్వాలని నిర్ణయించాం."
- డాక్టర్ ప్రకాశ్, కళాశాల ప్రిన్సిపాల్.
58 మంది విద్యార్థుల సస్పెన్షన్..
కర్ణాటక, శివమొగ్గ జిల్లా శిరాలకొప్పాలోని ప్రభుత్వ ప్రీయూనివర్సిటీ కళాశాలలో శనివారం.. హిజాబ్ ధరించిన 58 మంది విద్యార్థులను సస్పెండ్ చేశారు. దీంతో కళాశాల ముందు ఆందోళనకు దిగారు విద్యార్థులు. తమను తరగతులకు అనుమతించాలని డిమాండ్ చేశారు. తుముకూరు జిల్లాలో 20 మంది విద్యార్థులపై పోలీసులు ఎఫ్ఐఆర్ నమోదు చేసిన మరుసటి రోజునే ఈ సంఘటన జరగటం గమనార్హం.
హైకోర్టు తీర్పు ప్రకారం నడుచుకోవాలని విద్యార్థులకు వివరించినప్పటికీ.. వారు హిజాబ్ను తీసివేసేందుకు నిరాకరించినట్లు కళాశాల ప్రిన్సిపాల్ తెలిపారు. దాంతో తాత్కాలికంగా వారిని సస్పెండ్ చేసినట్లు చెప్పారు. దీంతో కళాశాల యాజమాన్యం, విద్యార్థుల మధ్య వాగ్వాదం జరిగింది. పోలీసులు కలగజేసుకుని వివాదాన్ని సద్దుమణిగేలా చేశారు. మరోవైపు.. బెళగావి, యాదగిరి, బల్లారి, చిత్రదుర్గమ్, శివమొగ్గ జిల్లాల్లోనూ విద్యార్థులు హిజాబ్లు ధరించి తరగతులకు హాజరవటం ఉద్రిక్తతలకు దారితీసింది.
హిజాబ్ ధరించి ఓటు వేస్తేందుకు వస్తే..
హిజాబ్ వివాదం తమిళనాడులోనూ కొనసాగుతోంది. స్థానిక సంస్థల ఎన్నికల వేళ మదురైలోని ఓ పోలింగ్ స్టేషన్కు హిజాబ్ ధరించి వచ్చిన ఓటరు, భాజపా బూత్ ఏజెంట్ మధ్య వాగ్వాదం జరిగింది. మేలూరులో హిజాబ్ ధరించిన ఓ మహిళా ఓటరు.. ఓటు వేసేందుకు రాగా అభ్యంతరం వ్యక్తం చేశాడు భాజపా ఏజెంట్. ఆమెను గుర్తించలేకపోతున్నట్లు చెప్పాడు. ఇద్దరి మధ్య మాటామాటా పెరిగి.. గందరగోళానికి దారితీయగా పోలింగ్ అధికారులు కలగజేసుకున్నారు. ఓటర్ కార్డు ద్వారా ఆమెను గుర్తించినట్లు చెప్పారు. ఏజెంట్ను బయటకు పంపించటం ద్వారా వివాదం సద్దుమణిగింది. డీఎంకే, ఏఐఏడీఎంకే సహా ఇతర పార్టీలు భాజపా ఏజెంట్ తీరును తప్పుపట్టాయి.
ఇదీ చూడండి: మంత్రి వివాదాస్పద వ్యాఖ్యలు- అసెంబ్లీలో అంత్యాక్షరితో ఎమ్మెల్యేల నిరసన
