దేశంలోని అనేక చోట్ల మళ్లీ టీకాలకు కొరత నెలకొంది. మహారాష్ట్రలోని నాగ్పుర్ వ్యాక్సినేషన్ సెంటర్ను తాత్కాలికంగా మూసివేశారు. దీంతో స్థానికులు నిరాశగా వెనుదిరుగుతున్నారు. టీకా ఎప్పుడు వేస్తారోనని ఎదురుచూస్తున్నారు.
"నేను ఒక క్యాన్సర్ బాధితురాలిని. నేను రెండో డోసు తీసుకోవాలి. దాని కోసం నేను ఎదురు చూస్తున్నాను. నేను మొదటి డోసు తీసుకుని 86 రోజులు అయ్యింది."
-శోభ, క్యాన్సర్ బాధితురాలు, నాగ్పుర్
గుజరాత్ అహ్మదాబాద్లోనూ ఇలాంటి దృశ్యాలే కనిపించాయి. వ్యాక్సిన్లు లేవంటూ కొన్ని టీకా పంపిణీ కేంద్రాల వద్ద అధికారులు నో వ్యాక్సినేషన్ బోర్డులు పెట్టారు. అయితే వ్యాక్సిన్ కొరతపై తమకు ఎలాంటి సమాచారం లేదని స్థానికలు అంటున్నారు. అందుకే టీకా పంపిణీ కేంద్రాల ఎదుట వేచి చూస్తున్నామని చెప్పారు.
మరో మూడు రోజుల్లో...
రాష్ట్రాలకు, కేంద్ర పాలిత ప్రాంతాలకు మరో మూడు రోజుల్లో 24 లక్షలకుపైగా కొవిడ్ టీకాలు అందించనున్నట్లు కేంద్రం ప్రకటించింది. ఇప్పటివరకు రాష్ట్రాలకు 32 కోట్లకు పైగా టీకా డోసులు ఉచితంగా ఇచ్చినట్లు తెలిపింది.
ఇదీ చదవండి:ప్రైవేటు టీకా కేంద్రాలకు జులై 1 నుంచి కొత్త రూల్స్!
