రెండో విడత కరోనా విజృంభణతో దేశంలో ప్రాణవాయువుకు తీవ్ర కొరత ఏర్పడింది. మహారాష్ట్ర జలగావ్లోని ఓ ఆస్పత్రిలో గురువారం(ఈ నెల 13న) రాత్రి ఆక్సిజన్ ట్యాంకు నిండుకునేందుకు సమయం దగ్గరపడింది. సకాలంలో ట్యాంకర్లు ఆస్పత్రికి చేరుకోలేకపోయాయి. ఈ తరుణంలో చాకచక్యంగా వ్యవహరించారు అక్కడి ఆక్సిజన్ నిర్వహణ వైద్యులు. కొద్దిపాటి ఆక్సిజన్ను అందరికీ సరఫరా చేసి.. సుమారు 270 మంది కొవిడ్ రోగులను కాపాడింది డాక్టర్ సందీప్ పటేల్ నేతృత్వంలోని బృందం.
ఇదీ చదవండి:కొవాగ్జిన్, కొవిషీల్డ్, స్పుత్నిక్-వి మధ్య తేడా ఏంటి?
'ఆపరేషన్ ఆక్సిజన్' సక్సెస్ అయిందిలా..
ఈ నెల 13న సాయంత్రం 7:30 గంటల ప్రాంతంలో ప్రభుత్వ వైద్య కశాశాలలో ఉన్న 20 కిలోలీటర్ల ఆక్సిజన్ అయిపోయేందుకు సమయం దగ్గర పడింది. ఈ సందర్భంలో ఎలాంటి ఆందోళనకు గురికాకుండా.. ట్యాంకర్ అయిపోవడానికి 10 నిముషాల ముందే 100 ఆక్సిజన్ సిలిండర్లను అమర్చింది సందీప్ బృందం. ఇందుకోసం సుమారు 8 గంటలు నిరంతరంగా శ్రమించారు సందీప్, ఆయన బృంద సభ్యులు. ఆ సమయంలో ఆస్పత్రి డీన్ రామానంద్ అక్కడే ఉండి వారి పనితీరును పర్యవేక్షించారు.
ఓ వైపు.. జన్మదిన వేడుకలు జరుపుకునేందుకు.. ఇంటి నుంచి ఫోన్కాల్స్ వచ్చినా.. వారికి సర్దిచెబుతూ విధి నిర్వహణకే ప్రాధాన్యం ఇచ్చారు సందీప్. సుదీర్ఘ ప్రయత్నం అనంతరం.. ఆపరేషన్ విజయవంతం కావడం వల్ల అతడిపై ప్రశంసలు వెల్లువెత్తాయి. తన పుట్టిన రోజు(మే 14) నాడు సైతం కుటుంబానికి దూరంగా ఉండి.. విధి నిర్వహణలో కీలకపాత్ర పోషించిన సందీప్ను డీన్ రామానంద్ ఘనంగా సత్కరించారు.
ఆఫీస్ టైమ్ అయిపోయినా..
ఈ సందర్భంలో.. విధులు నిర్వహించుకుని ఇంటికి వెళ్తున్న సిబ్బందిని ఆపి.. వారి సేవలనూ ఉపయోగించుకున్నారు డాక్టర్ సందీప్. వారితో అన్ని వార్డుల ఆక్సిజన్ నిల్వ సమాచారాన్ని సేకరించి.. ట్యాంకర్లో ఉన్న నిల్వ ఆక్సిజన్ను అందరికీ అందేలా ఏర్పాటు చేశారు. ఆ తర్వాత ఓ ప్రైవేట్ వ్యాపారిని పిలిపించి.. మరో 100 సిలిండర్లు ఆర్డర్ చేశారు. అనంతరం.. ఆ ఆస్పత్రికి రావాల్సిన ట్యాంకర్ అర్ధరాత్రి 12:42 గంటలకు అక్కడికి చేరుకుంది. దీంతో అందరూ ఒక్కసారిగా ఊపిరి పీల్చుకున్నారు.
ఇదీ చదవండి: 3వారాల్లో కరోనాను జయించిన 2నెలల పసికందు
