పొరపాటున తనను తానే తుపాకీతో కాల్చుకున్న ఓ యవకుడు.. పోలీసులను తప్పుదోవ పట్టించాడు. వారికి ఓ కట్టుకథ చెప్పి, సాక్ష్యాలను తారుమారు చేసేందుకు ప్రయత్నించాడు. అయితే.. చివరకు కటకటాల పాలయ్యాడు.
అసలేం జరిగిందంటే..?
దిల్లీలోని కాపాస్హెరా ప్రాంతంలోని ఓ గెస్ట్హౌస్ గదిలో శివమ్(18), ఓ మైనర్ సహా తన ముగ్గురు స్నేహితులతో కలిసి శుక్రవారం రాత్రి పార్టీ చేసుకున్నాడు. ఈ క్రమంలో వారంతా మద్యం సేవించారు. మైనర్ వద్ద.. లఖ్నవూ నుంచి అక్రమంగా తెప్పించుకున్న ఓ తుపాకీ ఉంది. శివమ్ ఆ తుపాకీని తీసి, పొరపాటున తనను తానే కాల్చుకున్నాడు. దాంతో అతని మోకాలిపై గాయమైంది. ఈ మేరకు ఓ సీనియర్ పోలీసు అధికారి తెలిపారు.
గది శుభ్రం చేసి..
"ఘటన జరిగిన వెంటనే శివమ్ స్నేహితులు.. లఖ్నవూలోని తమ సొంతూళ్లకు పరారయ్యారు. అతిథిగృహ సిబ్బంది సాయంతో రక్తం మరకలు ఉన్న గదిని శివమ్ శుభ్రం చేశాడు. మరో స్నేహితుని సాయంతో సఫ్దార్జంగ్లోని ఓ ఆస్పత్రిలో చేరాడు" అని పోలీసులు తెలిపారు. ఘటన గురించి శివమ్ను తాము ప్రశ్నించగా తప్పుదోవ పట్టించేలా సమాధానమిచ్చాడని చెప్పారు.
"ముందు తాను రోడ్డు ప్రమాదానికి గురయ్యానని శివమ్ చెప్పాడు. కానీ, ఆ తర్వాత ఓ కట్టుకథ అల్లాడు. ఇంటికి తిరుగువెళ్తున్న సమయంలో.. బైకుపై ఉన్న ఇద్దరు వ్యక్తులు కాపాస్హెరా ప్రాంతంలో తనను తుపాకీలతో బెదిరించి, డబ్బులు దోచుకునేందుకు యత్నించారని చెప్పాడు. వారిని అడ్డుకోగా... తనను కాల్చి, అక్కడి నుంచి వెళ్లిపోయారని చెప్పాడు. అయితే.. ఘటనాస్థలంలోని ప్రైవేట్ సెక్యూరిటీ గార్డులను ఈ విషయం గురించి ఆరా తీయగా.. అలాంటిది ఏదీ జరగలేదని చెప్పారు."
-పోలీసులు
"అన్ని పరిశీలించిన తర్వాత... శివమ్ అబద్ధమాడుతున్నట్లు తేలింది. వైద్య పరీక్షల్లో తనంతట తానుగానే కాల్చుకోవడం వల్లే ఈ ప్రమాదం జరిగిందని వైద్యులు తెలిపారు. మరోవైపు.. గెస్ట్హౌస్ సిబ్బందిని ప్రశ్నించగా... వారు కాల్పుల ఘటన గురించి అంగీకరించారు. సాక్ష్యాలను తారుమారు చేయడంలో శివమ్కు సాయం చేసినట్లు ఒప్పుకున్నారు" అని పోలీసులు చెప్పారు.
సంబంధిత సెక్షన్ల కింద నిందితులపై కేసు నమోదు చేసినట్లు దిల్లీ నైరుతి డిప్యూటీ పోలీస్ కమిషనర్ గౌరవ్ శర్మ తెలిపారు. పరారీలో ఉన్న నిందితులను లఖ్నవూలో అరెస్టు చేయగా.. మైనర్ను అదుపులోకి తీసుకున్నట్లు చెప్పారు. ముగ్గురు నిందితులు తమ పాఠశాల విద్యను మధ్యలోనే మానేసినట్లు పేర్కొన్నారు.
కాల్పుల ఘటనపై సమాచారం ఇవ్వనందుకు, లైసెన్సు లేకుండా అక్రమంగా గెస్ట్హౌస్ను నడిపిస్తున్నందుకు అతిథిగృహ యాజమాన్యంపై చట్టపరమైన చర్యలు తీసుకుంటామని పోలీసులు తెలిపారు. సాక్ష్యాలను తారుమారు చేసేందుకు యత్నించినందున వారిపై కేసు నమోదు చేసినట్లు చెప్పారు.
ఇవీ చూడండి:
