రక్షణ శాఖ మంత్రి రాజ్నాథ్ సింగ్ నేతృత్వంలో 'రక్షణ ఉత్పత్తుల సేకరణ మండలి(డీఏసీ)' సోమవారం కీలక నిర్ణయం తీసుకుంది. సాయుధ దళాలకు రూ.76,390 కోట్లు విలువైన ఆయుధాల కొనుగోలు ప్రతిపాదనలకు ఆమోదం తెలిపింది. స్వదేశీ ఉత్పత్తుల కొనుగోలు, తయారీలో భాగంగా ఈ మేరకు ఆమోదం తెలిపినట్లు రక్షణ శాఖ వర్గాలు తెలిపాయి.
"భారత సైన్యం కోసం.. స్వదేశీ సంస్థల నుంచి ఫోర్క్ లిఫ్ట్ ట్రక్కులు, బ్రిడ్జ్ లేయింగ్ ట్యాంకులు, యాంటీ ట్యాంక్ గైడెన్ మిసైల్స్ కలిగిన యుద్ధ వాహనాలు, రాడార్లను గుర్తించే ఆయుధాలు కొనుగోలు చేసేందుకు డీఏసీ ఆమోదం తెలిపింది. నౌకాదళం కోసం.. రు.36వేల కోట్లతో నెక్స్ట్ జనరేషన్ కొర్వెట్(ఎన్జీసీ)లను కొనుగోలు చేసేందుకు ఆమోదం లభించింది. అత్యాధునిక సాంకేతికతతో సరికొత్త అంతర్గత డిజైన్ ఆధారంగా ఈ ఎన్జీసీలను నిర్మించనుంది నౌకాదళం. మరోవైపు.. స్వదేశీ ఎయిరో ఇంజిన్ సామగ్రి వినియోగాన్ని పెంచే లక్ష్యంతో హిందుస్థాన్ ఎయిరోనాటిక్స్ లిమిటెడ్ ద్వారా డోర్నియర్ ఎయిర్క్రాఫ్ట్లు, సుఖోయ్-30 ఎంకేఐ ఎయిరో ఇంజిన్లను తయారు చేసేందుకు డీఏసీ ఆమోదం తెలపింది. "
- రక్షణ శాఖ
ఎన్జీసీలు వర్సటైల్ ప్లాట్ఫామ్లుగా రక్షణ శాఖ పేర్కొంది. అవి నిఘా మిషన్స్, ఎస్కార్ట్ ఆపరేషన్లు, ఉపరితల యాక్షన్ గ్రూప్ ఆపరేషన్లు, తీర ప్రాంత రక్షణ వంటి కీలక బాధ్యతలను నిర్వర్తిస్తాయని తెలిపింది. మరోవైపు.. రక్షణ శాఖలో డిజిటలీకరణను ప్రవేశపెట్టేందుకు స్వదేశీ ఉత్పత్తుల కొనుగోలు కింద.. 'డిజిటల్ కోస్ట్ గార్డ్' ప్రాజెక్టుకు రక్షణ ఉత్పత్తుల సేకరణ మండలి ఆమోదం తెలిపినట్లు వెల్లడించింది. ఈ ప్రాజెక్ట్ కింద.. వివిధ రకాల ఉపరితల, వాయుమార్గాల కార్యకలాపాలు, తీర ప్రాంత రక్షణ దళంలో లాజిస్టిక్స్, ఆర్థిక, హెచ్ఆర్ వంటి ప్రక్రియలను డిజిటలైజ్ చేయడానికి సురక్షితమైన నెట్వర్క్ ఏర్పాటు చేయనున్నట్లు తెలిపింది.
ఇదీ చూడండి: కేరళలో మరో వైరస్.. రెండు పాజిటివ్ కేసులు.. కేంద్రం హైఅలర్ట్
ఆ ఇద్దరికీ తెలియకుండా ఆమెకు మూడో పెళ్లి.. న్యాయం కోసం భర్తల పోరాటం!
