కాసేపట్లో పోస్ట్​మార్టమ్​.. అంతలోనే కదలిక!

మృతిచెందాడని భావించిన ఓ వ్యక్తికి పోస్ట్​మార్టమ్​ నిర్వహించేందుకు ప్రభుత్వ ఆస్పత్రి వైద్యులు ఏర్పాట్లు చేస్తున్నారు. ఇంతలో అతనికి చలనం వచ్చింది. దీంతో అప్రమత్తం అయిన వైద్యులు చికిత్స నిమిత్తం ప్రైవేటు ఆస్పత్రికి తరలించారు.

మృత్యువు అంచుల దాకా వెళ్లిన ఓ వ్యక్తి ప్రాణాలతో తిరిగివచ్చాడు. ఆగిపోయిందనుకున్న అతని గుండె మళ్లీ కొట్టుకోవడం మొదలుపెట్టింది. ఈ ఘటన కర్ణాటకలోని బాగల్​కోట్​​ జిల్లా మహాలింగపురలో గత నెల 27న జరిగింది.

చనిపోయాడు అనుకుని..

గత నెల 27న మహాలింగపుర - రబాకవి మార్గంలో ద్విచక్రవాహనం మీద ప్రయాణిస్తున్న శంకర్ రోడ్డు ప్రమాదానికి గురయ్యాడు. తీవ్రంగా గాయపడిన అతడిని స్థానికులు బెల్గాంలోని ఓ ప్రైవేటు ఆస్పత్రికి తరలించారు. అయితే శంకర్​ బతికే అవకాశాలు తక్కువ ఉన్నాయని ఆ ఆస్పత్రి వైద్యులు తేల్చిచెప్పేశారు. దీంతో అతడిని మహాలింగపుర ప్రభుత్వ ఆస్పత్రికి తీసుకెళ్లారు. అప్పటికే అతనిలో ఎలాంటి చలనం లేకపోవడం వల్ల మార్గమధ్యంలోనే మృతిచెందాడని అందరూ భావించారు.

ఇదే విషయాన్ని ప్రభుత్వ ఆస్పత్రి వైద్యులు కూడా ధ్రువీకరించారు. పోస్ట్​మార్టమ్కు కూడా సిద్ధం చేస్తున్నారు. ఇక కాసేపట్లో పోస్ట్​మార్టమ్​ నిర్వహిస్తారనగా అతని కాళ్లలో కదలిక వచ్చింది. ఇది గమనించిన వైద్యులు అతడిని ప్రైవేటు ఆస్పత్రికి తరలించమని సూచించారు. ప్రస్తుతం శంకర్​ చికిత్స పొందుతున్నాడు.

ఇదీ చదవండి : 'పోర్టులపై రూ.6 లక్షల కోట్ల పెట్టుబడులు'