'తౌక్టే' తుపాను పెను తుపానుగా మారిందని భారత వాతావరణ శాఖ వెల్లడించింది. సోమవారం తెల్లవారు జామున తుపానులో ఈ మార్పు జరిగిందని తెలిపింది. దీని వల్ల గాలి వేగం గంటకు 180-190 కి.మీటర్లకు పెరుగుతుందని చెప్పింది. గాలి దుమారం వేగం గంటకు 210 కి.మీటర్ల వరకు ఉంటుందని పేర్కొంది.
వాయువ్య దిశగా కదులుతున్న ఈ పెను తుపాను.. మధ్యాహ్నం 12గంటల నుంచి 3గంటల మధ్య గుజరాత్ తీరాన్ని తాకుతుందని ఐఎండీ చెప్పింది. రాత్రి 8 గంటల నుంచి 11 గంటల మధ్య పోర్బంద్-మహువా మధ్య తీరం దాటుతుందని చెప్పింది.
తుపాను నేపథ్యంలో సహాయ చర్యల కోసం భారత వైమానిక దళం చర్యలు చేపడుతోంది. 5xసి-130, 3xఎన్-32 యుద్ధ విమానాలను రంగంలోకి దించింది. ఎన్డీఆర్ఎఫ్ సిబ్బందిని తరలించేందుకు, విపత్తు సాయాన్ని అందించేందుకు వీటిని వినియోగిస్తోంది. పుణె, కోల్కతా, విజయవాడ నుంచి వివిధ సామగ్రిని అహ్మదాబాద్కు తరలిస్తోంది.
తుపాను ప్రభావంతో గుజరాత్లో లోతట్టు ప్రాంతాల్లోని వేల మందిని అధికారులు సురక్షిత ప్రాంతాలకు తరలించారు. ప్రజలు అత్యవసరమైతేనే బయటకు రావాలని ఆ రాష్ట్ర ముఖ్యమంత్రి విజయ్‌ రూపానీ కోరారు.
తీర ప్రాంతాల్లోని ఆరు రాష్ట్రాల్లో 100 బృందాల ఎన్డీఆర్ఎఫ్ బలగాలు మోహరించాయని అధికారులు తెలిపారు. వాటిలో సగం బలగాలను తుపాను ప్రభావం అధికంగా ఉన్న గుజరాత్లోనే మోహరించినట్లు చెప్పారు. తమిళనాడు, కర్ణాటకలో వర్షాల కారణంగా కొంత మంది మరణించారు.
తౌక్టా తుపాను ప్రభావంతో ముంబయి విమానాశ్రయ అధికారులు కీలక నిర్ణయం తీసుకున్నారు. సోమవారం ఉదయం 11 గంటల నుంచి మధ్యాహ్నం 2 గంటల వరకు విమాన సేవలను నిలిపివేస్తున్నట్లు చెప్పారు.
ఇదీ చూడండి: 'తౌక్టే' బీభత్సం- కర్ణాటకలో నలుగురు మృతి
