అసోం శాసనసభ ఎన్నికల్లో విజయం సాధించేందుకు కాంగ్రెస్ ప్రణాళికలు ముమ్మరం చేసింది. ఆ రాష్ట్రంలో ఎన్నికల స్క్రీనింగ్ ప్యానెల్ ఛైర్మన్గా మహారాష్ట్ర మాజీ ముఖ్యమంత్రి పృథ్వీరాజ్ చౌహాన్ను నియమించింది. కాంగ్రెస్ పార్టీ నాయకత్వాన్ని ప్రశ్నిస్తూ గతేడాది.. అధినేత్రి సోనియా గాంధీకి లేఖ రాసిన(జీ23 బృందం) అసమ్మతి నేతలలో పృథ్వీరాజ్ కూడా ఉన్నారు.
కమలేశ్వర్ పటేల్, దీపికా పాండే సింగ్ సభ్యులుగా ఉన్నారు. కమిటీ ఎక్స్ అఫీషియో సభ్యులుగా.. ఆల్ ఇండియా కాంగ్రెస్ కమిటీ(ఏఐసీసీ) ప్రధాన కార్యదర్శి, అసోం ఇన్-ఛార్జి జితేంద్ర సింగ్; పీసీసీ అధ్యక్షుడు రిపున్ బోరా; సీఎల్పీ నాయకుడు సైకియాలను నియమించింది కాంగ్రెస్. వారితో పాటు ఏఐసీసీ కార్యదర్శులు అనిరుధ్ సింగ్, పృథ్విరాజ్ ప్రభాకర్ సాథే, వికాస్ ఉపాధ్యాయలను కూడా ఈ జాబితాలో చేర్చింది.
ఈ కమిటీ అసెంబ్లీ ఎన్నికల్లో పోటీచేసే అభ్యర్థుల పేర్లను పరిశీలించి.. కేంద్ర ఎన్నికల కమిటీకి పంపేందుకు సిఫార్సు చేస్తుంది. సోనియా గాంధీ అధ్యక్షతన పార్టీ అభ్యర్థులపై తుది నిర్ణయం తీసుకుంటారు.
126 అసెంబ్లీ స్థానాలున్న అసోంలో.. మూడు దశల్లో(మార్చి 27, ఏప్రిల్ 1, ఏప్రిల్ 6) ఎన్నికలు జరగనున్నాయి. మే 2న ఫలితాలు వెలువడనున్నాయి.
బంగాల్లో..
బంగాల్లో 28 మందిని పరిశీలకులుగా నియమించింది ఏఐసీసీ. గుజరాత్, రాజస్థాన్, మధ్యప్రదేశ్, బిహార్, ఝార్ఖండ్ రాష్ట్రాల కాంగ్రెస్ నాయకులు ఇందులో ఉన్నారు. కోల్కతాను నాలుగు భాగాలు(ఉత్తర, దక్షిణ, మధ్య, బుర్రాబజార్)గా విభజించి.. నలుగురు నేతలకు బాధ్యతలు అప్పగించిన కాంగ్రెస్.. ఉత్తర 24 పరగణాలు, దక్షిణ 24 పరగణాలకు ఇద్దరు చొప్పున నియమించింది. మిగిలిన వారిలో జిల్లాకు ఒకరు చొప్పున బాధ్యతలు అప్పగించింది.
294 అసెంబ్లీ స్థానాలున్న బంగాల్లో.. ఎనిమిది దశల్లో ఈ నెల 27 నుంచి ఏప్రిల్ 29 వరకు పోలింగ్ జరగనుంది.
ఇదీ చూడండి: అసోం మహిళలతో ప్రియాంక గాంధీ గిరిజన నృత్యం
