ఛత్తీస్గఢ్ బీజాపుర్ జిల్లాలో శనివారం నక్సల్స్కు, జవాన్లకు మధ్య జరిగిన ఎన్కౌంటర్ అనంతరం 15 మంది భద్రతా సిబ్బంది అదృశ్యమయ్యారని తెలుస్తోంది. ఇప్పటికే ఇద్దరు జవాన్ల మృతదేహాలు లభ్యమయ్యాయని ఛత్తీస్గఢ్ పోలీసు వర్గాలు తెలిపాయి. 23 మంది గాయపడగా.. బీజాపుర్ ఆసుపత్రికి తరలించామని, మరో ఏడుగుర్ని రాయ్పుర్ ఆసుపత్రికి తరలించామని చెప్పాయి.
బీజాపుర్లోని తారెం ప్రాంతంలో జరిగిన ఎన్కౌంటర్లో ఐదుగురు భద్రతా సిబ్బంది ప్రాణాలు కోల్పోయారని, మరో 10 మందికి గాయాలయ్యాయని ఛత్తీస్గఢ్ డీజీపీ అవస్థీ తెలిపారు. నక్సల్ ఏరివేతలో భాగంగా ఆపరేషన్లు నిర్వహిస్తున్న భద్రతా దళాలపై మావోయిస్టులు కాల్పులు జరిపారని.. దీంతో భద్రతా దళాలు దాడి చేశాయని చెప్పారు.
9 మంది నక్సల్స్ హతం!
ప్రాథమిక సమాచారం ప్రకారం.. తొమ్మిది మంది నక్సల్స్ మరణించి ఉంటారని బస్తర్ ఐజీ పీ సుందర్ రాజ్ వెల్లడించారు. మరో 15 మంది గాయపడ్డారని తెలిపారు. ఈ విషయాన్ని ధ్రువీకరించేందుకు మరింత సమయం కావాలని చెప్పారు. తమ అంచనా ప్రకారం ఘటన జరిగిన ప్రాంతంలో 250 మంది నక్సల్స్ ఉన్నారన్నారు.
అమిత్ షా సంతాపం
బీజాపుర్ ఎన్కౌంటర్లో అమరులైన భద్రతా సిబ్బంది కుటుంబాలకు కేంద్ర హోంమంత్రి అమిత్ షా సంతాపం తెలిపారు. వారి త్యాగాలను దేశం ఎన్నటికీ మర్చిపోదని పేర్కొన్నారు. శాంతి వ్యతిరేకులపై తమ పోరాటం కొనసాగుతుందని ట్విట్టర్ వేదికగా స్పష్టం చేశారు.
ఈ ఘటనపై ఛత్తీస్గఢ్ ముఖ్యమంత్రి భూపేశ్ బఘేల్తో అమిత్ షా మాట్లాడారు. ఎన్కౌంటర్ వివరాలు ఫోన్లో అడిగి తెలుసుకున్నారు. సీఆర్పీఎఫ్ డైరెక్టర్ జనరల్ కుల్దీప్ సింగ్ను పరిస్థితిని సమీక్షించాలని షా ఆదేశించారు. ఈ మేరకు అధికార వర్గాలు తెలిపాయి.
