బంగాల్ ముఖ్యమంత్రి మమతా బెనర్జీ కాలికి గాయమైన ఘటనపై కేంద్ర ఎన్నికల సంఘానికి పోటాపోటీగా ఫిర్యాదులు చేశాయి అధికార తృణమూల్ కాంగ్రెస్, విపక్ష భాజపా.
శుక్రవారం ఉదయం టీఎంసీకి చెందిన ఆరుగురు ఎంపీలు దిల్లీలో ఈసీని కలిసి ఫిర్యాదు చేశారు. మమత కాలికి గాయమైన ఘటన అనుకోకుండా జరగలేదని, కుట్రపూరితంగానే జరిగిందని ఆరోపించారు. దీనిపై ఉన్నత స్థాయి విచారణ జరపాలని డిమాండ్ చేశారు.
ఈసీకి భాజపా ఫిర్యాదు..
మమత కాలికి గాయమైన ఘటనపై భాజపా నేతలు శుక్రవారం సాయంత్రం కేంద్ర ఎన్నికల సంఘాన్ని కలిసి ఫిర్యాదు చేశారు. దీనిపై స్వతంత్ర దర్యాప్తునకు డిమాండ్ చేసినట్లు ఆ పార్టీ ప్రధాన కార్యదర్శి భూపేందర్ యాదవ్ తెలిపారు. మార్చి 10న మమత ఎన్నికల ర్యాలీకి సంబంధించిన వీడియోను విడుదల చేయాలని కోరినట్లు చెప్పారు.
టీఎంసీపై భాజపా విమర్శలు..
ఈ వ్యవహారంపై టీఎంసీ కుట్రపూరిత కథనాలు ప్రచారం చేసి రాష్ట్రంలో రాజకీయ సంక్షోభం సృష్టించాలని ప్రయత్నిస్తోందని ఆరోపించింది భాజపా. రాష్ట్రంలో ఆదరణ కోల్పోతున్నందునే ఇలాంటి చర్యలకు పూనుకుంటోందని విమర్శించింది. టీఎంసీ సీనియర్ నేతలు సైతం రాష్ట్ర అధికార యంత్రాంగం మాటలను వక్రీకరించి రాజకీయంగా లబ్ధిపొందాలని చూస్తున్నారని ఆరోపించింది. ఈ సంఘటనపై పూర్తి స్థాయి విచారణకు డిమాండ్ చేశారు భాజపా అధికార ప్రతినిధి శామిక్ భట్టాచార్య. మమత త్వరగా కోలుకుని, ప్రచారంలో పాల్గొనాలని ఆకాంక్షించారు.
ఇదీ చూడండి: ఆసుపత్రి నుంచి మమతా బెనర్జీ డిశ్చార్జ్
