1984 సిక్కు వ్యతిరేక అల్లర్ల గురించి కాంగ్రెస్ నేత శ్యాం పిట్రోడా చేసిన వ్యాఖ్యలపై పార్టీ అధ్యక్షుడు రాహుల్ గాంధీ మరోసారి స్పందించారు. ఆయన వ్యాఖ్యలు ముమ్మాటికీ తప్పేనని పంజాబ్లోని ఫతేగఢ్ ఎన్నికల ర్యాలీలో అన్నారు.
"1984 సిక్కు వ్యతిరేక అల్లర్లపై శ్యాం పిట్రోడా వ్యాఖ్యలు తప్పు. అందుకు పిట్రోడా దేశ ప్రజలను క్షమాపణలు కోరాలి. ఈ విషయాన్ని నేను బహిరంగంగా చెబుతున్నాను. ఇదే విషయాన్ని పిట్రోడాకు ఫోన్ ద్వారా చెప్పాను. పిట్రోడా.. మీరు చేసిన వ్యాఖ్యలు ముమ్మాటికీ తప్పే. అందుకు మీరు సిగ్గుపడాలి. ఈ వ్యాఖ్యలపై మీరు తప్పక క్షమాపణలు చెప్పాలి. "
- రాహుల్ గాంధీ, కాంగ్రెస్ అధ్యక్షుడు
పిట్రోడా వ్యాఖ్యలు
సిక్కుల ఊచకోతపై జస్టిస్ నానావతి కమిషన్ నివేదిక ప్రకారం.. అల్లర్లపై అప్పటి ప్రధాని కార్యాలయం నుంచే ఆదేశాలు వెళ్లాయని భాజపా గతంలో ఆరోపించింది. ఈ ఆరోపణలకు సమాధానమిస్తూ వివాదాస్పద వ్యాఖ్యలు చేశారు పిట్రోడా.
"1984 గురించి ఇప్పుడెందుకు? అయిందేదో అయిపోయింది. ఐదేళ్లలో ఏం చేశారో దాని గురించి మాట్లాడండి." అని వ్యాఖ్యానించారు పిట్రోడా.
పిట్రోడా వ్యాఖ్యలను భాజపా తీవ్రంగా తప్పుబట్టింది. ఈ మాటలు... కాంగ్రెస్ దురహంకారానికి ప్రతీక అని ఆగ్రహం వ్యక్తం చేశారు ప్రధాని నరేంద్రమోదీ.
ఇదీ చూడండి : 'పిట్రోడా వ్యాఖ్యలు దురహంకారానికి ప్రతీక'
