మహారాష్ట్రలో అమానుష ఘటన చోటు చేసుకుంది. సాయం అడిగిన ఓ యువతిని ముగ్గురు వ్యక్తులు రెండు గంటల్లో.. వేరువేరు ప్రదేశాల్లో అత్యాచారం చేశారు. కేసు నమోదు చేసిన పోలీసులు నిందితులను అరెస్టు చేశారు.
అసలెలా జరిగింది..
ఫిబ్రవరి 18న సబర్బన్ ఘాట్కోపర్ రైల్వేస్టేషన్లో తన బంధువులతో కలిసి వెళ్లాల్సిన యువతి.. రైలును సమయానికి అందుకోలేకపోయింది. అనంతరం వేరే రైలులో ముంబ్రా స్టేషన్ చేరుకొని.. ఆ రాత్రికి అక్కడే నిద్రపోయింది.
ఫిబ్రవరి 19 ఉదయాన్నే మరో రైలెక్కి దివా స్టేషన్ చేరుకుంది. అక్కడినుంచి వెళ్లడానికి డబ్బుల్లేక.. తన ముక్కుపుడకను అమ్మిపెట్టమని ఓ యాచకురాలిని అడిగింది. అయితే.. ఆ ప్రయత్నం విఫలం కాగా రింగ్ను విక్రయించేందుకు గంటల పాటు ఆపసోపాలు పడిందా యువతి. ఇక ఏం చెయ్యాలో తెలియక అలా స్టేషన్ చేరుకునేందుకు నడవడం ప్రారంభించింది.
సుమారు రాత్రి 8.30 గంటల ప్రాంతంలో తనను దగ్గర్లోని రైల్వే స్టేషన్లో వదిలిపెట్టమని ఓ ఆటోడ్రైవర్ను అడిగింది. అతను మహిళను నమ్మించి శిథిలావస్థలో ఉన్న ఓ భవనంలోకి తీసుకెళ్లి అత్యాచారానికి పాల్పడ్డాడు. ఆ తర్వాత తీసుకెళ్లి ఓ గుడి దగ్గర వదిలేశాడు.
మరో సారి కూడా..
అక్కడి నుంచి ఆ యువతి.. రాత్రి 10 గంటల సమయంలో బైక్పై వెళ్తున్న ఇద్దరు యువకులను రైల్వే స్టేషన్కు వెళ్లేందుకు సాయం చేయమని అడిగింది. నమ్మి వెళ్లిన మహిళ మరోసారి మోసపోయింది. ఆ దుర్మార్గులు యువతిని నిర్మానుష్య ప్రదేశానికి తీసుకెళ్లి అత్యాచారానికి ఒడిగట్టారు.
బాధితురాలు ఇచ్చిన ఫిర్యాదు మేరకు నిందితులను అరెస్టు చేశారు పోలీసులు.
