మహారాష్ట్రలో 'చెరిసగం పదవి' ప్రతిపాదనపై ప్రతిష్టంభన నెలకొన్న వేళ భాజపాపై విమర్శలు చేస్తూనే ఉంది శివసేన. ఆ పార్టీ అధికారిక పత్రిక 'సామ్నా'లో ప్రచురితమైన సంపాదకీయంలో కేంద్ర ప్రభుత్వంపై వ్యంగ్యాస్త్రాలు సంధించింది. షోలే సినిమాలో ప్రేక్షకులను కంటతడి పెట్టించిన డైలాగ్ను భాజపాపై ప్రయోగించింది శివసేన.
షోలే చిత్రంలో ఓ అంధుడి కుమారుడ్ని గబ్బర్సింగ్ చంపి గ్రామానికి తీసుకొచ్చి పడేస్తాడు. ఈ విషయాన్ని ఆ అంధునికి చెప్పలేక గ్రామస్థులు మౌనంగా రోదిస్తారు. ఏ జరిగిందో అర్థం కాక అంధుని పాత్ర వేసిన హంగల్ "ఇత్నా సన్నాటా క్యూ హై భాయ్"(ఇంత మౌనంగా ఎందుకు ఉన్నారు సోదరా) అని దీనంగా అడికే సన్నివేశం అందరినీ కంటతడి పెట్టిస్తుంది.
దేశ ఆర్థిక వ్యవస్థ తీరును విమర్శిస్తూ ఇలాగే దీనంగా ప్రశ్నించింది సామ్నా. ఆర్థిక వ్యవస్థ మందగమనంలో ఉంటే మౌనంగా ఎందుకున్నారంటూ దిగాలుగా అడిగింది ఠాక్రేల పత్రిక.
"అమ్మకాల గణాంకాలు తగ్గడం వల్ల మార్కెట్లు కళ తప్పాయి. మాంద్యం భయాలతో కొన్ని పరిశ్రమలు 30 నుంచి 40 శాతం వరకు నష్టపోయాయి. మరికొన్ని మూతపడ్డాయి. ఈ పరిస్థితి నిరుద్యోగానికి దారితీస్తోంది.
బ్యాంకులు ఆర్థిక సంక్షోభంలో కూరుకుపోయాయి. ప్రభుత్వం ఆర్బీఐ నుంచి నిధులు తీసుకోవాల్సిన పరిస్థితి నెలకొంది. దీపావళి రోజు మార్కెట్లలో నిశబ్దం నెలకొంది. అదే సమయంలో విదేశీ కంపెనీలు ఆన్లైన్ షాపింగ్ ద్వారా వారి ఖజానా నింపుకున్నాయి. ఇలాంటి పరిస్థితుల్లో మౌనంగా ఎందుకు ఉన్నారు సోదరా?"
-సామ్నా సంపాదకీయం
ఇటీవల జరిగిన మహారాష్ట్ర అసెంబ్లీ ఎన్నికల్లో 288 స్థానాలకు గానూ 105 సీట్లను గెలుచుకుంది భాజపా. గతేడాదితో పోలిస్తే 17 స్థానాలు తగ్గాయి. శివసేన పరిస్థితి అంతే.. గతేడాది 63 స్థానాలు గెలుచుకున్న పార్టీ ఈ సారి 56 స్థానాలకే పరిమితమైంది.
ఎన్నికల ముందే పొత్తు పెట్టుకొని ఫలితాల తర్వాత ప్రభుత్వ ఏర్పాటుకు సిద్ధమయ్యాయి భాజపా, శివసేన. ఐదేళ్ల పాలనను సగం సగం పంచుకుందామని సేన ప్రతిపాదించింది. దీనిపై భాజపా మాత్రం ఎటూ తేల్చడంలేదు. అందుకే కమలదళానికి ఇలాంటి చురకలు అంటిస్తోంది శివసేన.
ఇదీ చూడండి:'మహా' పాలనపై శివసేన అధినేతతో అమిత్షా భేటీ!
