నీరు తాగకపోతే పిల్లల్లో డీ హెడ్రేషన్ ఏర్పడి సమస్యలు ఎదుర్కొంటారు. విద్యార్థులకు తాగడానికి నీటి సీసాలను పాఠశాలకు పంపించినా సరిగ్గా తాగరు. కారణమడిగితే ఖాళీ దొరకలేదంటూ సమాధానం చెబుతుంటారు. ఈ సమస్యకు కేరళ రాష్ట్రం చెరువత్తూరు, వలియరంబు గ్రామ పంచాయతీల పరిధిలోని పాఠశాలల్లో పరిష్కారం కనుగొన్నారు. ప్రతి మూడు గంటలకు ఒకసారి నీటి బెల్లు కొడుతున్నారు. ఆ సమయంలో విద్యార్థులు నీరు తాగేలా ఉపాధ్యాయులు పర్యవేక్షిస్తుంటారు.
ఈ కార్యక్రమం ఇటీవల సమాజిక మాధ్యమాల్లో వైరల్ అయింది. ఈ స్ఫూర్తిని వివిధ ప్రాంతాల్లోని విద్యాసంస్థలు అందిపుచ్చుకుంటున్నాయి.
ఆంధ్రప్రదేశ్లో
విద్యార్థుల ఆరోగ్యాన్ని కాంక్షిస్తూ కేరళ స్ఫూర్తితో ఆంధ్రపదేశ్ కర్నూలు జిల్లా కేంద్రంలోని ఉమ్మర్ అరబిక్ పాఠశాలలో 'వాటర్ బెల్' కార్యక్రమం ప్రారంభించారు. ఎమ్మెల్యే హఫీజ్ ఖాన్, జిల్లా కలెక్టర్ వీరపాండియన్ హాజరయ్యారు.
తమిళనాడులో
పాఠశాలల్లో విద్యార్థులు నీరు తాగేందుకు ప్రతి మూడు తరగతుల(పీరియడ్) మధ్య పది నిమిషాల సమయం కేటాయించనున్నట్లు తమిళనాడు పాఠశాల విద్యాశాఖ మంత్రి కేఏ సెంగొట్టయాన్ ప్రకటించారు. తరచూ నీరు తాగితే ఆరోగ్యానికి శ్రేయస్కరమని వైద్య నిపుణులు సూచించిన నేపథ్యంలో ఈ నిర్ణయం తీసుకున్నట్లు వెల్లడించారు.
కర్ణాటకలో పరిశీలన..
పాఠాశాలల్లో నీటిబెల్లు అంశంపై అధ్యయనం చేయాలని కర్ణాటక అధికారులను విద్యామంత్రి సురేశ్ కుమార్ ఆదేశించారు.
ఇదీ చూడండి: విద్యను ఉపాధితో అనుసంధానం చేయాల్సిందే
