మందుబాబులు.. వారి భార్యల మధ్య జరిగే రచ్చ అంతా ఇంతా కాదు. రోజు తాగి రావడం.. గొడవ పడటం సాధారణం. భార్య గోల తట్టుకోలేక మందు మానేద్దాం అనుకునే భర్తలు కొందరైతే.. 'భార్యనైనా వదులుకుంటా కానీ బాటిల్ను వదులుకోను' అనేవారు ఇంకొందరు. ఈ రెండో రకానికి చెందిన ఓ భర్త... భార్యను భయపెట్టడానికి సొంత బిడ్డనే సంచిలో దాచిపెట్టి చివరకు పోలీసులకు చిక్కాడు.
కర్ణాటకలోని బెల్లందుర్కు చెందిన సుశీల్ కుమార్కు మద్యం అలవాటు విపరీతంగా ఉంది. దీనితో సుశీల్.. అతడి భార్యకు నిత్యం గొడవలు జరుగుతూనే ఉండేవి. భార్య అరుపులతో విసుగెత్తిన సుశీల్.. ఆమెను భయపెట్టాలనుకున్నాడు. ఇందుకోసం సొంత బిడ్డనే అస్త్రంగా చేసుకున్నాడు.
సుశీల్ ఆ చిన్నారిని సంచిలో దాచి స్కూటర్ ముందు భాగంపై పెట్టాడు. ఇది గమనించిన ఓ యువతి.. బిడ్డను అపహరిస్తున్నాడనుకుంది. వెంటనే ఫొటో తీసి సామాజిక మాధ్యమాల్లో అప్లోడ్ చేసింది. రంగంలోకి దిగిన పోలీసులు.. ఫొటో ఆధారంగా గాలింపు చేపట్టారు. చివరికి ఓ మాల్ వద్ద సుశీల్ను పట్టుకున్నారు. భార్యను భయపెట్టడానికే ఇలా చేసినట్టు అంగీకరించాడు సుశీల్. మరోసారి ఇలా చేస్తే తీవ్ర పరిణామాలు తప్పవంటూ.. ఆ మందుబాబును పోలీసులు మందలించి వదిలేశారు.
ఇదీ చూడండి- శాడిస్ట్ భర్త: భార్యపై అనుమానంతో కత్తిరించాడు
