జమ్ముకశ్మీర్ బారాముల్లా జిల్లా సోపోర్ ప్రాంతంలో ఎన్కౌంటర్ జరిగింది. ఎదురు కాల్పుల్లో ముగ్గురు తీవ్రవాదులను హతమార్చినట్లు అధికారులు తెలిపారు. మృతుల్లో ఒకర్ని పాకిస్థాన్ లష్కరే తోయిబా ఉగ్రవాద సంస్థకు చెందిన వ్యక్తిగా గుర్తించినట్లు వెల్లడించారు. వీరి నుంచి ఆయుధాలను, మందుగుండు సామగ్రిని స్వాధీనం చేసుకున్నారు.
సోపోర్ పట్టణంలోని రెబాన్ ప్రాంతంలో ఉగ్రవాదులు నక్కి ఉన్నారన్న సమాచారంతో అర్ధరాత్రి భద్రతా దళాలు గాలింపు చర్యలు చేపట్టాయి. భద్రతా దళాలను గమనించిన ముష్కరులు ఉదయం 4 గంటల సమయంలో కాల్పులకు తెగబడ్డారు. ఇరువురి మధ్య జరిగిన ఎదురు కాల్పుల్లో ముగ్గురు ఉగ్రవాదుల్ని హత మార్చాయి దళాలు.
"ఈ ఎన్కౌంటర్లో పాకిస్థాన్ లష్కరే తోయిబా సంస్థకు చెందిన ఉగ్రవాది ఉస్మాన్ మృతి చెందాడు. అతను ఇటీవల సోపోర్లో జరిగిన ఉగ్ర దాడిలో పాల్గొన్నాడు. ఈ ఘటనలో ఒక సీఆర్పీఎఫ్ జవాన్ అమరుడు కాగా మరో పౌరుడు కూడా మృతి చెందాడు. పోలీసులకు, భద్రతా దళాలకు ఇది భారీ విజయం" అని కశ్మీర్ జోన్ పోలీసులు ట్వీట్ చేశారు.
ఇదీ చూడండి:శిశువు అనుకుని బొమ్మకు పోస్ట్మార్టం... చివరకు...
