కరోనా నియంత్రణ చర్యల్లో భాగంగా టెస్టుల విషయంలో కీలక నిర్ణయం తీసుకుంది ఐసీఎంఆర్. లక్షణాలు ఉండి.. ఆర్టీ-పీసీఆర్ ద్వారా చేసే ర్యాపిడ్ యాంటీజెన్ టెస్టుల్లో నెగెటివ్ వస్తే మళ్లీ పరీక్ష చేయాలని అన్ని రాష్ట్రాలు, కేంద్ర పాలిత ప్రాంతాలకు ఆదేశాలు జారీ చేసింది. అప్పుడు పాజిటివ్ కొవిడ్-19 కేసులను మరింత బాగా గుర్తించవచ్చని.. తద్వారా కరోనా వ్యాప్తిని అరికట్టడంలో మంచి ఫలితాలు వస్తాయని భావిస్తోంది.
రెండు రోజుల తర్వాత చేయాల్సిందే..
జ్వరం, దగ్గు, శ్వాస తీసుకోవడంలో ఇబ్బందులు వంటి లక్షణాలు ఉంటే ర్యాపిడ్ టెస్టులు చేస్తారు. వాటిల్లో నెగెటివ్ వస్తే మళ్లీ ఆర్టీ-పీసీఆర్ టెస్టు చేయాలి. లక్షణాలు లేని వారికి ర్యాపిడ్ టెస్టుల్లో నెగెటివ్ వచ్చినా.. టెస్టు చేసిన రెండు రోజుల తర్వాత మళ్లీ ఆర్టీ-పీసీఆర్ టెస్టులు చేయాలి. కానీ ఈ రెండు సందర్భాల్లోనూ అలా జరగట్లేదు. అందుకే దీనిపై ఐసీఎంఆర్ దృష్టి సారించింది.
ప్రత్యేక బృందాలు..
నూతన మార్గదర్శకాల అమలును పర్యవేక్షించేందుకు.. ప్రత్యేక అధికారి లేదా బృందాలను ప్రతి రాష్ట్రం, జిల్లాలో ఏర్పాటు చేయాలని ఆదేశాలు జారీ చేసింది కేంద్రం. ఇలాంటి కేసుల విషయంలో ఫాలో అప్ చేయటం కోసం ఈ బృందాలు పనిచేయనున్నాయి. ప్రతి ప్రాంతంలో రోజువారీగా జరిగే ర్యాపిడ్ యాంటీజెన్ టెస్టులను విశ్లేషించనున్నాయి. ఎటువంటి ఆలస్యం లేకుండా లక్షణాలు ఉండే నెగెటివ్ కేసుల్లో టెస్టులను చేసే విధంగా పర్యవేక్షణ చేయనున్నారు ఈ ప్రత్యేకాధికారులు.
కరోనా కేసులు ఎక్కువ అవుతున్న నేపథ్యంలో పరీక్షల సామర్థ్యం పెంచేందుకు మాత్రమే ర్యాపిడ్ను వినియోగిస్తుతున్నారు. అయితే కచ్చితమైన ఫలితాలు తెలుసుకునేందుకు ఆర్టీ-పీసీఆర్ టెస్టులు కీలకమైనవి.
భారత్లో బుధవారం ఒక్కరోజే అత్యధికంగా 95,735 కేసులు, 1172 మరణాలు నమోదయ్యాయి. ఇప్పటివరకు మొత్తం కేసులు 44,65,863కు చేరగా.. మరణించిన వారి సంఖ్య 75,062గా నమోదైంది. కరోనా నుంచి కోలుకున్న వారు 34,71,738 మంది ఉన్నారు
