కాంగ్రెస్ అధ్యక్ష పదవి నుంచి సోనియా గాంధీ తప్పుకునే అవకాశాలు కనపడుతున్నాయి. పార్టీని సమర్థవంతంగా నడిపించే కొత్త నాయకుడిని ఎన్నుకోవాలని నేతలను సోనియా కోరినట్టు తెలుస్తోంది. కాంగ్రెస్ నాయకత్వాన్ని పూర్థిస్థాయిలో మార్చాలని డిమాండ్ చేస్తూ కొంతమంది సీనియర్ నేతలు రాసిన లేఖపై సోనియా ఈ మేరకు నిర్ణయం తీసుకున్నట్టు సమాచారం. అయితే.. సోమవారం జరగబోయే కాంగ్రెస్ వర్కింగ్ కమిటీ సమావేశంలో దీనిపై స్పష్టత వచ్చే అవకాశముంది.
అనిశ్చితి..
అధ్యక్ష పదవికి రాజీనామా చేసిన క్రమంలో పార్టీకి గాంధీయేతరులే అధ్యక్షులు అవుతారని రాహుల్ గాంధీ ఇప్పటికే స్పష్టం చేశారు. ఇదే విషయాన్ని ప్రియాంకా గాంధీ కూడా వెల్లడించారు. అయితే.. ప్రస్తుతం పార్టీ అధ్యక్షుడిగా కొత్త వారిని ఎన్నుకోవటాన్ని చాలా మంది నేతలు వ్యతిరేకిస్తున్నారు. సోనియానే పదవిలో కొనసాగాలని లేదా.. రాహుల్ గాంధీని తిరిగి అధ్యక్షుడిగా నియమించాలని డిమాండ్ చేస్తున్నారు. దీంతో సోమవారం జరిగే సీడబ్ల్యూసీ సమావేశంలో సోనియా రాజీనామాను అంగీకరించే విషయంపై అనిశ్చితి ఉండక తప్పదని రుజువు అవుతోంది.
'ఆ వార్తలు అవాస్తవం...'
అయితే.. సోనియా రాజీనామాపై వస్తున్న వార్తలు అవాస్తవమని పేర్కొన్నారు పార్టీ అధికార ప్రతినిధి రణ్దీప్ సింగ్ సుర్జేవాలా. పార్టీ నాయకత్వం మార్పుపై సోనియా గాంధీ ఎలాంటి అధికారిక ప్రకటన చేయలేదన్నారు.
సోనియావైపే..
మరోవైపు సోనియా గాంధీ నాయకత్వానికే మద్దతు పలుకుతూ రాహుల్ గాంధీకి లేఖ రాశారు ఛత్తీస్గఢ్ ముఖ్యమంత్రి భూపేశ్ బగేల్. ప్రస్తుత విపత్కర పరిస్థితుల్లో సోనియా మార్గదర్శకత్వం అవసరమని పేర్కొన్నారు. మరోవైపు కాంగ్రెస్ నేతలు చేస్తున్న డిమాండ్ను వ్యతిరేకించారు పంజాబ్ సీఎం అమరిందర్ సింగ్. ఇది సరైన సమయం కాదని.. ఎన్డీఏ ప్రభుత్వానికి బలమైన ప్రతిపక్షంగా ఉండాల్సిన అవసరం కాంగ్రెస్కు ఉందన్నారు. ప్రస్తుత సమయంలో పార్టీ నాయకత్వాన్ని మార్చాలని కోరటం సరికాదని పేర్కొన్నారు మాజీ కేంద్ర మంత్రి అశ్వినీ కుమార్.
గాంధీయేతర వ్యక్తి కాంగ్రెస్ అధ్యక్షుడిగా ఎన్నికైతే.. పార్టీ చీలిపోతుందని కొంత మంది నేతలు అభిప్రాయపడుతున్నారు. నెహ్రూ-గాంధీ కుటుంబీకులే పార్టీని నడిపించాలని ఎక్కవ మంది కాంగ్రెస్ నేతలు కోరుకుంటున్నారు.
ఇదీ చూడండి: కాంగ్రెస్లో మళ్లీ అంతర్యుద్ధం- కారణం ఆ 'లేఖ'!
