మెలానియాకు దిల్లీ విద్యార్థుల ఆసక్తికర ప్రశ్నలు

దిల్లీలోని ఓ ప్రభుత్వ పాఠశాలను సందర్శించిన అమెరికా అధ్యక్షుడి సతీమణి మెలానియా ట్రంప్​పై ప్రశ్నల వర్షం కురిపించారు అక్కడి విద్యార్థులు. అమెరికా ప్రథమ మహిళగా మీరు ఏం చేస్తారని ఓ బాలిక అడగ్గా.. అమెరికా ఎంత పెద్దది? అగ్రరాజ్యం చాలా దూరంలో ఉంటుందా? వంటి ప్రశ్నలు సంధించారు మరికొంతమంది చిన్నారులు.

భారత్ పర్యటనలో భాగంగా దిల్లీలోని ఓ ప్రభుత్వ పాఠశాలను సందర్శించారు అమెరికా ప్రథమ మహిళ మెలానియా ట్రంప్​. దక్షిణ దిల్లీలోని సర్వోదయ సీనియర్​ సెకండరీ పాఠశాలలో సుమారు గంటపాటు విద్యార్థులతో గడిపారు మెలానియా. తరగతి ఉపాధ్యాయుడి ప్రోత్సాహంతో విద్యార్థులు ఆమెపై ప్రశ్నలు సంధించారు.

అమెరికా ఎంత పెద్దదని ఓ బాలిక అడగగా.. భారత్ ​నుంచి అగ్రరాజ్యం దూరమా? అని మరో బాలిక, ప్రథమ మహిళగా మీరు ఏమి చేస్తారని ఇంకో చిన్నారి ప్రశ్నించింది. వారి ప్రశ్నలకు నవ్వుతూ బదులిచ్చారు మెలానియా.

మొదటి తరగతి విద్యార్థుల కోసం పాఠశాలలో ప్రత్యేకంగా ఓ గది ఉంది. అందులో మట్టితో బొమ్మలు తయారు చేస్తున్న పిల్లలతో ఆమె సరదాగా గడిపారు ట్రంప్​ సతీమణి. ఆ మట్టితో ఏమి చేస్తారని పిల్లలను అడిగారు ఆమె.

నాలుగో తరగతి విద్యార్థులకు నిర్వహించిన 'హ్యాపీనెస్​ క్లాస్​'ను కాసేపు వీక్షించారు మెలానియా. వారు ధ్యానం చేస్తుండగా ఆమె అసక్తిగా తిలకించారు.

ఇదీ చూడండి: భారత్​-అమెరికా మధ్య 3 ఒప్పందాలు... 'వాణిజ్యం' వాయిదా