మైనార్టీలను జాతీయ స్థాయి గణాంకాల ఆధారంగా కాకుండా రాష్ట్ర స్థాయి గణాంకాల ప్రకారం గుర్తించాలని దాఖలైన ప్రజాప్రయోజన వ్యాజ్యంపై సుప్రీం కోర్టు విచారణ చేపట్టింది. ఈ పిటిషన్పై అటార్నీ జనరల్ కేకే వేణుగోపాల్ సాయం కోరింది.
భారత ప్రధాన న్యాయమూర్తి జస్టిస్ రంజన్ గొగొయి నేతృత్వంలోని త్రిసభ్య ధర్మాసనం వ్యాజ్యాన్ని విచారించింది. వ్యాజ్యం దాఖలు చేసిన భాజపా నేత, న్యాయవాది అశ్వినీకుమార్ ఉపాధ్యాయ.. పిటిషన్ కాపీలను అటార్నీ జనరల్ కార్యాలయానికి అందించాలని ఆదేశించింది. దీనిపై నాలుగు వారాల తరువాత విచారణ చేపట్టనున్నట్లు వెల్లడించింది.
మైనార్టీ వర్గాలను గుర్తించడంలో జాతీయ స్థాయి గణాంకాలను పరిగణనలోకి తీసుకోవడం సరికాదని సీనియర్ న్యాయవాది ముఖుల్ రోహత్గీ సర్వోన్నత న్యాయస్థానానికి తెలిపారు.
ముస్లింలు, క్రిస్టియన్లు, సిక్కులు, బౌద్ధులు, పార్శీలను మైనార్టీలుగా గుర్తిస్తూ 26 ఏళ్ల క్రితం కేంద్ర ప్రభుత్వం నోటిఫికేషన్ విడుదల చేసింది. ఈ నోటిఫికేషన్ను సవాలు చేస్తూ మైనార్టీ అనే పదాన్ని రాష్ట్రస్థాయి జనాభా ఆధారంగా నిర్వచించాలని అశ్వినీకుమార్ పిటిషన్ దాఖలు చేశారు. జాతీయ స్థాయి గణాంకాల ఆధారంగా మెజార్టీగా ఉన్న హిందువులు..కొన్ని ఈశాన్య రాష్ట్రాలతో పాటు, జమ్ముకశ్మీర్లో మైనార్టీలుగా ఉన్న విషయాన్ని గుర్తు చేశారు. ఆయా రాష్ట్రాల్లో హిందువులకు మైనార్టీలకు అందాల్సిన ప్రయోజనాలు లభించడం లేదని తెలిపారు.
2011 జనాభా లెక్కల ప్రకారం 8 రాష్ట్రాల్లో హిందువులు మైనార్టీలుగా ఉన్నారు.
ఇదీ చూడండి: 9నెలల్లో బాబ్రీ కేసు తీర్పు ఇవ్వాలి: సుప్రీం
