2019 జాతీయ దర్యాప్తు సంస్థ చట్టంలో చేసిన సవరణలను సవాలు చేస్తూ సుప్రీంలో దాఖలైన పిటిషన్ను విచారించేందుకు ధర్మాసనం అంగీకారం తెలిపింది. జస్టిస్ ఆర్ఎఫ్ నారిమన్, జస్టిస్ ఎస్ రవింద్ర భట్ నేతృత్వంలోని ధర్మాసనం ఈ అంశంపై నాలుగు వారాల్లో సమాధానం ఇవ్వాలని కేంద్రాన్ని ఆదేశించింది.
పిటిషన్ దాఖలు చేసిన 'సాలిడారిటీ యూత్ మూమెంట్' సంస్థ.. జాతీయ భద్రతకు సంబంధించిన నేరాలపై విచారణ జరిపేందుకు రూపొందించిన ఈ చట్టానికి కొత్తగా సవరణ చేయడం వల్ల బలహీనమైందని పేర్కొంది .
జాతీయ భద్రత, దేశ సమగ్రత, సార్వభౌమాధికారం, విదేశాలతో సత్సంబంధాలు, అంతర్జాతీయ ఒప్పందాలు తదితర వాటికి సంబంధించిన కేసులన్నింటినీ దర్యాప్తు చేసేందుకు ఎన్ఐఏను రూపొందించినట్లు పిటిషన్లో వివరించారు. కాగా.. వ్యభిచారం కోసం మైనర్లను అక్రమ రవాణా చేయడం, వెట్టిచాకిరి, నకిలీ నోట్ల పంపిణీ వంటి ఉగ్రవాదానికి సంబంధం లేని నేరాలను చట్ట సవరణలో పొందుపరిచారు. తద్వారా రాష్ట్ర దర్యాప్తు సంస్థలకు చెందిన అధికారాలను కేంద్రం గుప్పెట్లోకి తీసుకుందని పిటిషన్లో పేర్కొన్నారు.
చట్టాన్ని సవాలు చేసిన తొలి రాష్ట్రం
ఈ చట్ట సవరణను సవాల్ చేస్తూ కాంగ్రెస్ నేతృత్వంలోని ఛత్తీస్గఢ్ ప్రభుత్వం జనవరి 15న సుప్రీం కోర్టును ఆశ్రయించింది. ఎన్ఐఏ చట్టం రాజ్యాంగ విరుద్ధంగా, ఏకపక్షంగా ఉందని ఆరోపించింది. రాష్ట్ర సార్వభౌమాధికారాన్ని ఈ సవరణ ప్రభావితం చేస్తుందని, కేంద్రానికి హద్దులేని అధికారాన్ని అందిస్తుందని పేర్కొంది. ఆర్టికల్ 131 కింద దావా వేసి ఈ చట్టాన్ని సవాలు చేసిన మొదటి రాష్టంగా ఛత్తీస్గఢ్ నిలిచింది.
ఎందుకీ చట్టం
2008 ముంబయి దాడి తర్వాత కాంగ్రెస్ సీనియర్ నేత పి. చిదంబరం హోంమంత్రిగా ఉన్న సమయంలో మన్మోహన్ సింగ్ ప్రభుత్వం ఈ చట్టాన్ని తీసుకొచ్చింది. దేశంలో ఏ ప్రాంతంలోనైనా ఉగ్రవాద దాడులపై రాష్ట్రాల అనుమతి లేకుండా దర్యాప్తు చేసేందుకు ఈ చట్టాన్ని రూపొందించింది.
ఇదీ చదవండి:వందేళ్లుగా ఆ గ్రామ ప్రజలు సంక్రాంతికి దూరం!
