కార్గిల్ యుద్ధంలో విజయం సాధించి నేటికి 20 ఏళ్లు. ఆపరేషన్ విజయ్కు గుర్తుగా నిర్వహించే కార్గిల్ దివస్ వేడుకలను దేశవ్యాప్తంగా నిర్వహిస్తున్నారు. అమర జవాన్లకు నివాళిగా జమ్ముకశ్మీర్ ద్రాస్లోని కార్గిల్ యుద్ధ స్మారకం, దిల్లీలోని జాతీయ యుద్ధ స్మారకం వద్ద నివాళులర్పించనున్నారు పలువురు నేతలు, అధికారులు.
రాష్ట్రపతి రామ్నాథ్ కోవింద్, రక్షణ మంత్రి రాజ్నాథ్ సింగ్ జమ్ముకశ్మీర్ ద్రాస్లోని కార్గిల్ యుద్ధ స్మారకం వద్ద నిర్వహించే కార్యక్రమాల్లో పాల్గొననున్నారు. అమర జవాన్లకు నివాళులర్పించి శ్రద్ధాంజలి ఘటించనున్నారు. ఆనవాయితీ ప్రకారం దిల్లీలోని ఇండియా గేట్ వద్ద గల అమర జవాన్ జ్యోతి వద్ద ప్రధాని నరేంద్ర మోదీ నివాళులు అర్పిస్తారు.
విజయ జ్యోతి
కార్గిల్ దివస్ ముందస్తు కార్యక్రమాల్లో భాగంగా ఈ నెల 14న దిల్లీలోని జాతీయ యుద్ధ స్మారకం వద్ద 'విజయ జ్యోతి'ని వెలిగించారు రాజ్నాథ్ సింగ్. సైన్యానికి చెందిన ద్విచక్ర వాహనాల బృందానికి జ్యోతిని అందించారు. ఆ జ్యోతి నేడు ద్రాస్లోని కార్గిల్ యుద్ధ స్మారకానికి చేరుకోనుంది. అక్కడి అమర జ్యోతిలో ఐక్యమవుతుంది.
ఇదీ చూడండి: ఆపరేషన్ విజయ్: కార్గిల్ పరాక్రమానికి 20 ఏళ్లు
