నిర్భయ దోషులకు దిల్లీ కోర్టు డెత్ వారెంట్ జారీ చేసిన నేపథ్యంలో ఉరి శిక్ష కోసం ఆదివారం ట్రయల్స్ నిర్వహించారు జైలు అధికారులు.
నిర్భయ కేసులో నిందితులైన ముకేశ్(32), పవన్ గుప్తా(25), వినయ్ శర్మ(26), అక్షయ్ కుమార్ సింగ్(31)లను ఈ నెల 22న ఉదయం 7 గంటలకు తిహార్ జైలులో ఉరి తీయాల్సిందిగా దిల్లీ కోర్టు ఇటీవలే తీర్పు వెలువరించింది. ఈ నేపథ్యంలోనే ఉరిశిక్ష అమలులో భాగంగా ట్రయల్స్ నిర్వహించారు అధికారులు.
దోషుల బరువు ప్రకారం ఇసుక, రాళ్లతో నిండిన బస్తాలను ట్రయల్స్లో ఉపయోగించినట్లు జైలు సీనియర్ అధికారి ఒకరు పేర్కొన్నారు.
తలారి వస్తున్నాడు..
ఈ నలుగురు దోషులను ఉరి తీసేందుకు.. పవన్ జల్లాద్నే పంపనున్నట్లు యూపీ పోలీసు అధికారులు ధ్రువీకరించారని స్పష్టం చేశారు తిహార్ జైలు సిబ్బంది. 2013లో పార్లమెంటుపై దాడి దోషి అఫ్జల్‌ గురును ఉరి తీసిన జైలు నెంబర్ 3లోనే నిర్భయ దోషులకు మరణ శిక్ష అమలు చేయనున్నారు. నలుగురు దోషులను ఒకేసారి ఉరి తీసే అవకాశం ఉన్నట్లు తెలుస్తోంది.
ఇదీ చూడండి: ప్రపంచంలోనే తొలి 'చిల్డ్రన్ న్యూట్రిషన్ పార్క్'
