దేశంలో సంచలనం సృష్టించిన నిర్భయ కేసులో దోషుల మరణ దండనకు ఆదేశాలు వచ్చినా అమలుపై ఇంకా సందిగ్ధం నెలకొంది. ఓవైపు శనివారం ఉరి శిక్ష అమలు చేసేందుకు తిహార్ జైల్లో ఏర్పాట్లు ముమ్మరంగా సాగుతున్నాయి. మరోవైపు మరణ దండనను ఆలస్యం చేసేందుకు దోషులు న్యాయపరమైన అవకాశాలను ఉపయోగించుకుంటున్నారు.
దోషుల్లో ఒకడైన ముకేశ్ కుమార్ క్షమాభిక్ష పిటిషన్ కారణంగా ఇప్పటికే జనవరి 22న అమలు కావాల్సిన శిక్ష.. ఫిబ్రవరి 1కి వాయిదా పడింది. ప్రస్తుతం మరో దోషి వినయ్ కుమార్ తాజాగా రాష్ట్రపతికి క్షమాభిక్ష అర్జీ పెట్టుకున్నాడు. మూడో దోషి అక్షయ్‌ ఠాకూర్‌ దాఖలు చేసిన క్యురేటివ్ పిటిషన్ను న్యాయస్థానం నిన్న కొట్టివేసినా అతనికి ఇంకా న్యాయపరమైన అవకాశాలు ఉన్నాయి. మరో దోషి పవన్ గుప్తాకు క్యురేటివ్ పిటిషన్ దాఖలు చేసేందుకు అవకాశముంది.
తిహార్ జైలుకు కోర్టు నోటీసులు
ఇదే కారణంతో మరణ శిక్ష అమలుపై నిరవధికంగా స్టే విధించాలని నలుగురు దోషులు.. దిల్లీ కోర్టులో పిటిషన్ దాఖలు చేశారు. ఈ వ్యాజ్యం విచారణకు రాగా.. ప్రభుత్వ తరఫు న్యాయవాది అభ్యంతరం వ్యక్తం చేశారు. ఈ పిటిషన్... న్యాయ వ్యవస్థను అపహాస్యం చేసేలా, శిక్షను ఆలస్యం చేసే ఎత్తుగడలా ఉందని వాదించారు.
