వలస జీవులపై కరోనా ప్రభావం అంతా ఇంతా కాదు. లాక్డౌన్తో ఉన్న చోట ఉండలేక.. సొంత ఊళ్లకు వెళ్లలేక ఎంతో సతమతమవుతున్నారు వలస కార్మికులు. ఈ క్రమంలో కొందరు నిబంధనలను ఉల్లంఘిస్తున్నారు. ఎలాగైనా సొంతూళ్లకు చేరుకోవాలని అడ్డదారులు తొక్కుతున్నారు. తాజాగా ఇలాంటి ఘటనే దేశ రాజధాని దిల్లీలో జరిగింది. రెండు ట్రక్కుల్లో దాక్కుని వెళ్తున్న దాదాపు 100మంది వలస కూలీలను పట్టుకున్నారు దిల్లీ పోలీసులు. వారిని అక్రమంగా రవాణా చేస్తున్న లారీ డ్రైవర్లను అదుపులోకి తీసుకున్నారు.
ఇదీ జరిగింది...
దిల్లీలోని ఆర్కే పురం, ఓక్లా ఫేస్-1లో ఉంటున్న వలస కూలీలు.. బిహార్లోని సొంత ఇళ్లకు వెళ్లాలని నిశ్చయించుకున్నారు. రెండు లారీల్లో బయలు దేరారు. అక్రమ రవాణా కోసం వలస కార్మికుల నుంచి డబ్బులు కూడా తీసుకున్నారు లారీ యజమానులు.
ఈ రెండు లారీలను ఆగ్నేయ దిల్లీలోని కలింది కుంజ్ వద్ద శనివారం రాత్రి అడ్డుకున్నారు పోలీసులు. ఓ లారీలో 63మంది, మరో లారీలో 34మంది ఉన్నట్టు గుర్తించారు. ట్రక్కు ఓనర్, డ్రైవర్ అయిన ఉపేంద్ర సింగ్ను అదుపులోకి తీసుకున్నారు. మరో డ్రైవర్ను కూడా అరెస్టు చేశారు. వీరిపై కేసులు నమోదు చేశారు.
కార్మికులను విడిచిపెట్టినట్లు స్పష్టం చేశారు పోలీసులు.
వలస కూలీల కోసం ప్రభుత్వం రైళ్లను నడుపుతున్నప్పటికీ.. అనేక మంది ఇంకా తమ ఊళ్లకు పాదయాత్ర చేస్తున్నారు. కొంతమంది సైకిళ్లను వాడుతున్నారు.
ఇదీ చూడండి:- సముద్ర తీరాన తాబేళ్ల కనువిందు
