గోరఖ్పూర్...! రాజకీయంగా ప్రముఖంగా వినిపించే పేరు. కారణం... ఉత్తర్ప్రదేశ్ ముఖ్యమంత్రి యోగి ఆదిత్యనాథ్ సొంత ఇలాఖా కావడం. కానీ ఇదే ప్రాంతంలోని ఓ గ్రామ ప్రజలకు స్వాతంత్ర్యం వచ్చినప్పటి నుంచి ఓటు హక్కు కల్పించలేదు. మొదటి సారి ఈ లోక్సభ ఎన్నికల్లో వారంతా ఓటేయనున్నారు.
పంతానియా గ్రామం అటవీ ప్రాంతంలో ఉంటుంది. రోడ్లు కూడా సరిగా లేని ఈ ఊరిలో ప్రజలు వ్యవసాయం చేసుకొని జీవిస్తుంటారు.
బ్రిటిష్ సైనికులతో పాటు మా నాన్న, వారి తండ్రి ఇక్కడికి వచ్చారు. అప్పటి నుంచి ఇక్కడే ఉంటున్నాం. ఇప్పుడు మేము వ్యవసాయం చేసుకుంటున్నాం. అంతకుముందు వనవిభాగంలో చెట్లు కొట్టే పని చేసేవాళ్లం. నలుగురు ఐదుగురు కలిసి బృందంగా పనిచేసే వాళ్లం.
- ముఖ్లాన్, పంతానియా గ్రామస్థుడు
ప్రస్తుత ప్రభుత్వం చొరవ వల్లే ఓటు హక్కు వచ్చిందని స్థానికులు చెబుతున్నారు.
మాకు మొదటిసారి ఎన్నికల్లో ఓటేయటానికి అవకాశం వచ్చింది. మేము ఇక్కడ 40-45 సంవత్సరాల నుంచి నివసిస్తున్నాం. అంతకుముందు మేము కట్టెలు కొట్టుకొని బతికేవాళ్లం. 27 ఏళ్ల నుంచి చెట్లు నరకటానికి అనుమతించలేదు. అడవిలో ఉంటున్న మాకు మరో పని చేయటానికి అవకాశం లేదు. ఇటీవలే మాకు ఇళ్లు వచ్చాయి. దీనిపై మేము సంతోషంగా ఉన్నాం.
- విజయ్, పంతానియా గ్రామస్థుడు
