మహారాష్ట్రలో అసెంబ్లీ ఎన్నికల ప్రచారాన్ని ప్రారంభించారు కాంగ్రెస్ సీనియర్ నేత రాహుల్ గాంధీ. లాతూర్ ఎన్నికల ర్యాలీలో పాల్గొన్న ఆయన కేంద్రంపై విమర్శలు గుప్పించారు. ప్రధాని నరేంద్ర మోదీ, కేంద్ర హోంమంత్రి అమిత్ షా, మీడియా... వాస్తవ సమస్యల నుంచి ప్రజల దృష్టిని మళ్లిస్తున్నారని ఆరోపించారు రాహుల్. యువత ఉద్యోగాలు కావాలని అడిగితే చంద్రుని వైపు చూడమని ప్రభుత్వం చెబుతోందన్నారు. ఇటీవల ఇస్రో నిర్వహించిన చంద్రయాన్-2 ప్రయోగాన్ని ఉద్దేశించి ఈ వ్యాఖ్యలు చేశారు.
" చంద్రుని వైపు చూడండి. హిందూస్థాన్ రాకెట్ను పంపిందన్నారు. బాగా చెప్పారు. ఇస్రోను ఏర్పాటు చేసింది కాంగ్రెస్. రెండు రోజుల్లో రాకెట్ వెళ్లలేదు. దాని ప్రయోజనాలు మోదీ పొందుతున్నారు. చంద్రునిపైకి రాకెట్ వెళ్లినంత మాత్రానా దేశంలోని యువత కంచాల్లోకి భోజనం రాదు. చైనా అధ్యక్షుడితో కూర్చొని మోదీ చాయ్ తాగారు. డోక్లాంలో ఏం జరిగిందని మోదీ ఆయనను అడిగారా? "
-రాహుల్ గాంధీ, కాంగ్రెస్ అధ్యక్షుడు
15 మంది ధనికులకు రూ.5.5 లక్షల కోట్ల రుణాలను మోదీ సర్కారు మాఫీ చేసిందని ఆరోపించారు రాహుల్. రైతుల సమస్యలు, నిరుద్యోగంపై మాత్రం కేంద్రం, మీడియా మౌనం వహిస్తున్నాయని ధ్వజమెత్తారు. చంద్రయాన్, ఆర్టికల్ 370 రద్దు గురించి మాత్రమే వారు పదే పదే ప్రస్తావిస్తున్నారని దుయ్యబట్టారు రాహుల్.
చైనా అధ్యక్షుడు జిన్పింగ్తో చెన్నైలో మోదీ భేటీపైనా విమర్శలు చేశారు రాహుల్. 2017లో డోక్లాంలోకి చైనా బలగాలు మోహరించిన విషయాన్ని సమావేశంలో ప్రధాని ప్రస్తావించారో లేదో స్పష్టత ఇవ్వాలన్నారు.
ఇదీ చూడండి: ఆర్టికల్ 370పై విపక్షాలకు మోదీ సవాల్
