కేంద్ర ప్రభుత్వ అభివృద్ధి ప్రాజెక్టులను అమలు చేయాల్సిన ప్రాంతాలను గుర్తించేందుకు మైనార్టీ వ్యవహారాల శాఖ అధికారుల బృందం రెండు రోజుల పాటు కశ్మీర్లో పర్యటించనుంది. అధికరణ 370 రద్దు నేపథ్యంలో కశ్మీర్ ప్రగతి రథాన్ని పరుగులు పెట్టించే లక్ష్యంతో ఈ చర్యలు చేపడుతున్నట్లు ఆ శాఖ మంత్రి ముక్తార్ అబ్బాస్ నఖ్వీ పీటీఐ ముఖాముఖిలో చెప్పారు.
"ఆగస్టు 27, 28 తేదీల్లో రెండు రోజుల పాటు కశ్మీర్ లోయలో మా శాఖ కార్యదర్శితో పాటు సీనియర్ అధికారుల బృందం పర్యటించనుంది. పాఠశాలలు, కళాశాలలు, నైపుణ్యాభివృద్ధి కేంద్రాలు వంటివి ప్రారంభించేందుకు అవకాశం ఉన్న ప్రాంతాలను గుర్తించనుంది. సామాజిక-ఆర్థిక అభివృద్ధి ప్రాజెక్టులు చేపట్టేందుకు ఉన్న అవకాశాలను పరిశీలించనుంది "
- ముక్తార్ అబ్బాస్ నఖ్వీ, కేంద్ర మంత్రి
ఈ పర్యటన అనంతరం ఇదే బృందం లద్దాఖ్లోనూ పర్యటించనుందని పేర్కొన్నారు కేంద్ర మంత్రి. ఆర్టికల్ 370 రద్దును పునఃపరిశీలించాలనే వాదనలు తోసిపుచ్చారు. వెనక్కి తగ్గేది లేదని తేల్చి చెప్పారు.
ఆర్టికల్ 370 రద్దును వ్యతిరేకించిన రాజకీయ నేతలు కూడా ప్రభుత్వం తీసుకునే అభివృద్ధి కార్యక్రమాలకు మద్దతు తెలపాలని కోరారు నఖ్వీ.
విపక్షాల ఊహలకు విరుద్ధంగా...
370 రద్దు తర్వాత జమ్ముకశ్మీర్లో హింస చెలరేగుతుందని విపక్షాలు భావించినా... అక్కడి ప్రజలు అందుకు భిన్నంగా స్పందించారని చెప్పారు నఖ్వీ.
"కేంద్ర ప్రభుత్వ నిర్ణయాన్ని జమ్ము, కశ్మీర్, లద్దాఖ్ ప్రజలు స్వాగతించారు. అక్కడి ప్రజలకు అధికరణ 370 ఏమీ ఇవ్వలేకపోయింది. విద్య, ఉపాధి, మానవ హక్కులు, మైనార్టీలు, పిల్లల హక్కులపై ఉన్న సుమారు 100కుపైగా చట్టాలు అక్కడ అమలు కాలేదు. అందుకే ఆర్టికల్ 370 అనేది వారి అభివృద్ధికి పెద్ద ఆటంకమని గ్రహించారు. "
- ముక్తార్ అబ్బాస్ నఖ్వీ, కేంద్ర మంత్రి
ఇదీ చూడండి: 'కశ్మీర్ రాజకీయం'పై ప్రియాంక కౌంటర్ ఎటాక్
