ఉత్తర్ప్రదేశ్ మథురాలో ఎంతో ప్రత్యేకమైన 'చప్పన్ భోగ్' ఉత్సవాలు నేటి నుంచి మూడు రోజుల పాటు జరుగుతాయి. ఈ ఏడాది వేడుకను ఇస్రో ఎంతో ప్రతిష్ఠాత్మకంగా చేపట్టిన చంద్రయాన్-2కు అంకితం చేస్తున్నట్లు నిర్వాహకులు తెలిపారు. చంద్రయాన్-2 ప్రయోగం విజయవంతం కావాలని ప్రత్యేక పూజలు చేయనున్నట్లు శ్రీ గిరిరాజ్ సేవా సమితి స్థాపకులు, అధ్యక్షులు మురారి అగర్వాల్ వెల్లడించారు.
ప్రధాని మోదీతో పాటు, చంద్రయాన్-2, చంద్రయాన్-3 ప్రాజెక్టులలో భాగస్వాములుగా ఉన్న భారత అంతరిక్ష పరిశోధన సంస్థ (ఇస్రో) శాస్త్రవేత్తలకూ ఆహ్వానం పంపినట్లు తెలిపారు అగర్వాల్. ఆలయ గర్భగుడిలో చంద్రయాన్-3 నమూనాతో రత్నాలు, ఆభరణాలను అలంకరించనున్నట్లు చెప్పారు.
మూడు రోజుల ఉత్సవం
నేడు ప్రారంభం కానున్న చప్పన్ భోగ్ ఉత్సవం మూడురోజుల పాటు జరగనుంది. గోవర్ధన పర్వతం చుట్టూ సుమారు 23 కిలోమీటర్లు శ్రీ కృష్ణడిని రథంపై ఊరేగిస్తారు. దాదాపు 4 లక్షల మంది భక్తులు హాజరయ్యే అవకాశం ఉందని నిర్వాహకులు తెలిపారు. వేడుక కోసం 56 రకాల ప్రసాదాలను సిద్ధం చేస్తున్నట్లు చెప్పారు.
ఆవు నెయ్యి, ఇతర పదార్థాలతో 21వేల కిలోల ప్రసాదాన్ని తయారు చేయిస్తున్నారు. తయారీ కోసం లఖ్నవూ, ఆగ్రా, ఇండోర్, రత్లం, మధురై నుంచి నిపుణులను తీసుకువచ్చినట్లు నిర్వాహకులు చెప్పారు.
ఇదీ చూడండి:శ్వేత నాగు ఊళ్లోకి వచ్చి బుసలు కొట్టింది!
