కరోనా మహమ్మారిని అడ్డుకునేందుకు లాక్డౌన్ను మరిన్ని రోజులు పొడిగించనుంది కేంద్రం. ఆర్థిక వ్యవస్థపై ఉన్న ఒత్తిడిని తగ్గించే ప్రయత్నాల్లో భాగంగా లాక్డౌన్ 5.0లో పర్యటకం, ఆతిథ్య రంగానికి సడలింపులు ఇచ్చే అవకాశం ఉంది. ఆయా రంగాలపై ఎక్కువగా ఆధారపడే రాష్ట్రాలు వాటికి అనుమతించాలని కోరుతున్న నేపథ్యంలో ఆ దిశగా చర్చలు జరుపుతోంది.
పుదుచ్చెరి, కేరళ, గోవా సహా పలు ఈశాన్య రాష్ట్రాల ఆర్థిక వ్యవస్థలు పర్యటకం, ఆతిథ్య రంగంపైనే ఎక్కువగా ఆధారపడి ఉన్నాయి. అందుకే లాక్డౌన్ 5.0లో వివిధ రాష్ట్రాలు కోరుతున్నట్లుగా హోటళ్లు, రెస్టారెంట్లు, బీచ్లను ప్రారంభించే దారులు అన్వేషిస్తున్నట్లు ప్రభుత్వ వర్గాలు తెలిపాయి.
" పర్యటకం, ఆతిథ్య రంగంపై ఆధారపడే రాష్ట్రాలు ఇప్పటికీ ఇబ్బందుల్లోనే ఉన్నాయి. ఆయా రంగాల్లో నిబంధనలను సడలించాలని డిమాండ్ చేస్తున్నాయి. లాక్డౌన్ 5.0లో పర్యటకం, ఆతిథ్య పరిశ్రమకు సడలింపులు ఇవ్వొచ్చని భావిస్తున్నాం. భౌతిక దూరం పాటించటం, పర్యటకులను పరిమితంగా అనుమతించటం ద్వారా హోటళ్లు, రెస్టారెంట్లు, పర్యటక ప్రాంతాలను ప్రారంభించేందుకు రాష్ట్రాలు పలు సూచనలు చేశాయి. పరిమిత సంఖ్యలో సిట్టింగ్ సామర్థ్యం, థర్మల్ స్క్రీనింగ్, ఆరోగ్య సేతు యాప్ తప్పనిసరి చేయటం వంటి వాటితో కార్యకలాపాలకు అనుమతిస్తామని రాష్ట్రాలు చెప్పాయి. వాటిని ప్రారంభించటం ద్వారా రాష్ట్రాలకు అవసరమైన ఆదాయలను సమకూర్చుకోవచ్చని కేంద్రానికి వివరించాయి. ఆర్థిక రంగాన్ని ముందుకు తీసుకెళ్లేలా నిబంధనలను సులభతరం చేయడంపై కేంద్రం దృష్టి సారించింది. ఈ విషయంపై కేంద్రం విస్తృత చర్చలు జరుపుతోంది. కానీ.. ఇప్పటి వరకు ఎలాంటి నిర్ణయం తీసుకోలేదు."
– సీనియర్ అధికారి
మరోవైపు.. హోంశాఖ మంత్రి అమిత్ షాతో తాను మాట్లాడినట్లు గోవా ముఖ్యమంత్రి ప్రమోద్ సావంత్ తెలిపారు. మరో 15 రోజుల పాటు లాక్డౌన్ పొడిగించే అవకాశం ఉన్నట్లు చెప్పారు. 50 శాతం సామర్థ్యంతో భౌతిక దూరం పాటిస్తూ సేవలందించేలా రెస్టారెంట్లకు సడలింపులు ఇవ్వాలని గోవా ప్రభుత్వం డిమాండ్ చేస్తోందన్నారు. ఇప్పటికే చాలా మంది జిమ్లను తెరవాలని కోరకుంటున్నట్లు వెల్లడించారు.
కర్ణాటక ప్రభుత్వం హోటళ్లు తెరిచేందుకు మార్గదర్శకాలను విడుదల చేసినట్లయితే.. వచ్చే జూన్లో బెంగళూరులో హోటళ్లు ప్రారంభమయ్యే అవకాశం ఉంది.
